جماعتِ اسلامی نے شہر بھر میں ہیوی ٹریفک حادثات میں بڑھتی ہوئی اموات، ای چالان کے نظام اور حکومتی بے حسی کے خلاف آج کراچی کے متعدد اہم مقامات پر احتجاجی دھرنے دینے کا اعلان کر دیا ہے۔
جماعتِ اسلامی کی جانب سے جاری اعلامیے کے مطابق، شہر کی بڑی اور مرکزی شاہراہوں سمیت اہم عوامی مقامات پر شام 5 بجے احتجاجی دھرنے دیے جائیں گے۔
مزید پڑھیں: ای چالان یورپ جیسا اور سڑکیں کھنڈر، کراچی کے شہریوں کی تنقید
منعم ظفر خان کا شاہراہِ قائدین پر خطاب
امیر جماعتِ اسلامی کراچی منعم ظفر خان نورانی کباب ہاؤس چورنگی، شاہراہِ قائدین پر مرکزی احتجاجی دھرنے سے خطاب کریں گے۔
کراچی کے اہم مقامات پر دھرنے
اعلامیے کے مطابق جن مقامات پر بھی احتجاجی دھرنے دیے جائیں گے، ان میں اسٹارگیٹ، شاہراہِ فیصل، ایم اے جناح روڈ، یونیورسٹی روڈ، داؤد چورنگی، کورنگی کراسنگ، تبت سینٹر، موسمیات، پاور ہاؤس چورنگی، حب ریور روڈ، پراچہ چوک، شیر شاہ، حیدری، نارتھ ناظم آباد، لیاقت آباد نمبر 10، سہراب گوٹھ اور اورنگی ٹاؤن نمبر 5 شامل ہیں۔
یہ بھی پڑھیے عوام پر اضافی بوجھ ڈالا جارہا ہے: حافظ نعیم سندھ حکومت کے ای چالان سسٹم کے خلاف بول پڑے
احتجاجی تحریک کا پس منظر
واضح رہے کہ چند روز قبل امیر جماعتِ اسلامی پاکستان حافظ نعیم الرحمان نے موجودہ نظام، شہری مسائل اور حکومتی پالیسیوں کے خلاف ملک گیر احتجاجی تحریک شروع کرنے کا اعلان کیا تھا، جس کے تحت کراچی میں آج کے دھرنے منعقد کیے جا رہے ہیں۔
جماعتِ اسلامی کا کہنا ہے کہ جب تک شہریوں کی جان و مال کے تحفظ اور ٹریفک نظام کی اصلاح کے لیے سنجیدہ اقدامات نہیں کیے جاتے، احتجاج کا سلسلہ جاری رہے گا۔
