اسلام آباد کے تھانہ ترنول کے حدود میں پولیس نے بڑی کارروائی کرتے ہوئے بین الصوبائی، سابقہ ریکارڈ یافتہ نیڈو گینگ کے سرغنہ کو فائرنگ کے تبادلے کے بعد زخمی حالت میں گرفتار کر لیا، جبکہ اس کے 2 ساتھیوں کو بعد ازاں گرفتار کر لیا گیا۔
پولیس کے مطابق 3 مسلح ملزمان نے پولیس ریڈنگ ٹیم پر اندھا دھند فائرنگ کی، تاہم پولیس اہلکار بلٹ پروف جیکٹس اور حفاظتی اقدامات کی بدولت محفوظ رہے۔ ملزمان کی فائرنگ کے دوران ان ہی کے ساتھیوں کی گولی لگنے سے گینگ کا سرغنہ نوید ظفر زخمی ہو گیا، جسے موقع پر گرفتار کر لیا گیا۔
سنگین جرائم میں مطلوب ملزم
گرفتار ملزم نوید ظفر پنجاب کے مختلف اضلاع اور اسلام آباد میں دکانوں اور گھروں میں ڈاکہ زنی، راہزانی، بائیک چھیننے سمیت متعدد مقدمات میں پولیس کو مطلوب تھا۔
ریڈ اور فائرنگ کی تفصیلات
پولیس کو نیڈو گینگ کی موجودگی کی مصدقہ اطلاع ملی، جس پر ٹیم نے فوری کارروائی کرتے ہوئے ریڈ کیا۔ پولیس ٹیم کو دیکھتے ہی ملزمان نے فائرنگ شروع کر دی، جس کے جواب میں پولیس نے حفاظتی حکمت عملی اختیار کی اور مؤثر کارروائی کرتے ہوئے مرکزی ملزم کو گرفتار کر لیا۔
دیگر ملزمان بھی گرفتار
گرفتار ملزم کی نشاندہی اور ٹیکنیکل و دیگر ذرائع استعمال کرتے ہوئے اس کے 2 ساتھیوں نعیم اور ابوبکر کو بھی گرفتار کرلیا گیا۔
پولیس نے گرفتار ملزمان کے قبضے سے وارداتوں میں استعمال ہونے والا اسلحہ، موٹر سائیکل، بڑی تعداد میں چھینے گئے پرس، نقدی، گاڑیوں کی رجسٹریشن بکس، اسمارٹ کارڈز، موبائل فونز، کیمرہ جات برآمد کر لیے ہیں۔
پولیس کے مطابق گرفتار ملزمان نے دورانِ تفتیش دیگر وارداتوں کا بھی انکشاف کیا ہے، جن پر مزید تحقیقات جاری ہیں۔
ترجمان اسلام آباد پولیس کا کہنا ہے کہ شہر میں جرائم پیشہ عناصر کے خلاف کارروائیاں مزید تیز کی جائیں گی اور شہریوں کے جان و مال کے تحفظ کو ہر صورت یقینی بنایا جائے گا۔
