اپوزیشن اتحاد کے سربراہ محمود خان اچکزئی نے ملک کو ’موجودہ بحران‘ سے نکالنے کے لیے جمہوری مکالمے، مفاہمت اور باہمی معافی کی ضرورت پر زور دیتے ہوئے کہا ہے کہ اپوزیشن مذاکرات کے لیے مکمل طور پر تیار ہے۔
یہ بھی پڑھیں: جو ترمیم پارلیمنٹ کو کمزور کرنے کے لیے ہوگی، اس کا ڈٹ کر مقابلہ کریں گے، محمود خان اچکزئی
اسلام آباد میں اپوزیشن کی 2 روزہ قومی کانفرنس سے خطاب کرتے ہوئے محمود خان اچکزئی نے کہا کہ اب وقت آ گیا ہے کہ ہم ایک دوسرے کو معاف کریں اور آگے بڑھیں۔
انہوں نے کہا کہ آئیں، ہم سب مل کر ملک کو بربادی سے نکالیں، ہم جمہوری ڈائیلاگ کے لیے تیار ہیں اور معافی تلافی کا آغاز بھی ہم ہی کرتے ہیں۔
انہوں نے زور دیا کہ مولانا فضل الرحمان، نواز شریف اور جماعت اسلامی سمیت تمام سیاسی قائدین کو مل بیٹھ کر سنجیدہ بات چیت کرنی چاہیے تاکہ قومی مسائل کا حل نکالا جا سکے۔
اپوزیشن اتحاد کے سربراہ کا کہنا تھا کہ قائدین اور خاندانوں کی ملاقاتیں ان کا بنیادی حق ہیں جو ان کو دیا جانا چاہیے۔
محمود خان اچکزئی نے ایک بار پھر اس عزم کا اظہار کیا کہ اپوزیشن ملک کو درپیش سنگین حالات سے نکالنے کے لیے ہر سطح پر مکالمے کے لیے تیار ہے۔
عمران خان کی رہائی کا راستہ نکلے گا، بیرسٹر گوہر
اس موقعے پر بیرسٹر گوہر نے خطاب کرتے ہوئے کہا کہ وہ یہ امید رکھتے تھے کہ بانی پی ٹی آئی کی رہائی کے لیے آئین اور قانون کے دائرے میں کوئی راستہ نکلے گا۔
مزید پڑھیے: قومی اسمبلی: اپوزیشن نے محمود خان اچکزئی کو اپوزیشن لیڈر نامزد کردیا
تاہم ان کا کہنا تھا کہ ایسے فیصلوں سے عوام میں مایوسی بڑھتی ہے۔
فریقین مل بیٹھ کر خوداحتسابی کریں، جنید اکبر
پی ٹی آئی کے رہنما جنید اکبر نے بھی مفاہمت کی حمایت کرتے ہوئے کہا کہ تمام فریقین کو مل بیٹھ کر خود احتسابی کرنی چاہیے۔
مزید پڑھیں: ملکی بحران کا حل حکومت کی رخصتی میں ہے، محمود خان اچکزئی
ان کا کہنا تھا کہ آپ اپنی اصلاح کریں، ہم اپنی اصلاح کرتے ہیں، آئیے آج سے ایک نئی شروعات کریں تاکہ آگے بڑھا جا سکے۔
