وزیراعظم پاکستان شہباز شریف نے کہا ہے کہ معاشی اصلاحات کوئی آسان کام نہیں تھا، لیکن دہائیوں پر محیط مسائل اور ادارہ جاتی کمزوریوں کودور کرنا وقت کا تقاضا تھا۔
’اقتصادی گورننس اصلاحات‘ کی تقریب رونمائی سے ویڈیو لنک کے ذریعے خطاب کرتے ہوئے انہوں نے موجودہ اقتصادی صورتحال، کامیابیوں اور مستقبل کے اقدامات کا ذکر کیا۔
مزید پڑھیں: وزیرخزانہ کا معاشی اصلاحات پرزور، این ایف سی پر جنوری تک پیش رفت کا اعلان
شہباز شریف نے کہاکہ اصلاحات کا بنیادی مقصد ملکی معیشت کو استحکام دینا تھا، اصلاحات کا مقصد اداروں کی مضبوطی، شفافیت اور ملک کو نجی شعبے کی قیادت میں ترقی کی راہ پر گامزن کرنا تھا۔
تاریخ میں پہلی دفعہ ایف بی آر کا ڈیجیٹلائزیشن پروگرام کاغذوں سے نکل کر اس پر عملی طور پر کام ہوا ، وزیراعظم شہبازشریف pic.twitter.com/WxrOeo4spH
— WE News (@WENewsPk) December 31, 2025
انہوں نے کہاکہ تمام تر اقدامات پاکستان کے اپنے مفاد میں کیے جانے والے ہوم گرون ایجنڈا کا حصہ ہیں۔ گزشتہ 2 سال کے دوران معیشت میں واضح بہتری آئی ہے۔
انہوں نے کہاکہ مہنگائی 29.2 فیصد سے کم ہو کر 4.5 فیصد تک آئی،جبکہ زرمبادلہ کے ذخائر 9.2 ارب ڈالر سے بڑھ کر 21.2 ارب ڈالر ہو گئے۔
ان کا کہنا تھا کہ کرنٹ اکاؤنٹ خسارہ 3.3 ارب ڈالر سے 1.9 ارب ڈالر کے سرپلس میں تبدیل ہوگیا، جبکہ ٹیکس ٹو جی ڈی پی تناسب 8 فیصد سے بڑھ کر 10.5 فیصد ہوا۔
انہوں نے کہاکہ ایک لاکھ سے زیادہ نئے ٹیکس دہندگان نظام میں شامل ہوئے، ٹیکس وصولیاں 26 فیصد اضافے کے ساتھ بڑھیں۔
وزیراعظم نے کہاکہ ای پرکیورمنٹ اور ایف بی آر ڈیجیٹائزیشن کے منصوبوں کو کامیابی سے عملی جامہ پہنایا گیا۔
ان کا کہنا تھا کہ پی آئی اے سمیت دیگر اہم ریاستی اداروں کی نجکاری پر خاطر خواہ پیشرفت ہوئی، نجکاری کاعمل تیزی سے جاری رہے گا۔
انہوں نے کہاکہ یہ اقدامات طویل اور مشکل سفر کا حصہ ہیں، معاشی بہتری کے سفر میں دشوار گزار چیلنجز اور نئے مسائل کا سامنا ہوگا۔ لیکن مشترکہ محنت اور عزم کے ساتھ کامیابیاں حاصل ہو رہی ہیں۔
مزید پڑھیں: مہنگائی تاریخ کی کم ترین سطح پر، معاشی اشاریے بہتری کی جانب گامزن ہیں، وزیر خزانہ
وزیراعظم نے کہاکہ معاشی بہتری کے لیے عالمی شراکت داروں کی مشاورت اور حمایت قابل قدر ہے، اصلاحات کو تیزی کے ساتھ آگے بڑھایا جائے گا۔
انہوں نے کہاکہ ملکی معیشت کی مضبوطی اور پاکستان کو ترقی کی راہ پر گامزن کرنے کے لیے ہر ممکن اقدامات کریں گے، اب تک ملنے والی کامیابیاں کسی فرد کی نہیں بلکہ سب کی مشترکہ محنت کا نتیجہ ہیں۔
