وفاقی وزیر خزانہ محمد اورنگزیب نے کہا ہے کہ مہنگائی ملکی تاریخ کی کم ترین سطح پر ہے، اور معاشی اشاریے بہتری کی جانب گامزن ہیں۔
مزید پڑھیں: پاکستان کی معیشت اہم موڑ پر پہنچ چکی، ہم برآمدات پر مبنی ترقی کی جانب بڑھ رہے ہیں، وزیر خزانہ
’اقتصادی گورننس اصلاحات‘ کی تقریب رونمائی سے خطاب کرتے ہوئے انہوں نے کہاکہ معاشی بہتری کے باعث متعدد قرضوں کی ادائیگی وقت سے پہلے کی۔
انہوں نے کہاکہ معاشی اصلاحات کی بدولت سرمایہ کاروں کا اعتماد بحال ہوا، 2025 میں اسٹاک ایکسچینج کی کارکردگی بھی بہترین رہی۔
وزیر خزانہ نے کہاکہ مالیاتی شفافیت اور درآمدات کا توازن بہتر کرنے کے لیے اقدامات کیے گئے، قومی ایئر لائن پی آئی اے کی نجکاری اہم کامیابی ہے۔
محمد اورنگزیب نے کہاکہ مالی سال کے دوران شرح نمو 4 فیصد سے کہیں زیادہ رہے گی، 2025 میں ہمیں بدترین سیلاب کا سامنا کرنا پڑا، لیکن اس کے باوجود عالمی اداروں سے مدد نہ لینے کا فیصلہ کیا۔
مزید پڑھیں: روس سے تیل و توانائی کے شعبے میں ممکنہ معاہدے پر مشاورت جاری ہے، وزیر خزانہ محمد اورنگزیب
انہوں نے کہاکہ حکومتی اقدامات ملکی ترقی، روزگار کے مواقع اور معیشت کی مضبوطی کے لیے نہایت اہم ہیں، مضبوط پالیسی فریم ورک، مالیاتی شفافیت اورمعاشی اصلاحات کی بدولت سرمایہ کاروں کا اعتماد بڑھا۔
وزیر خزانہ نے مزید کہاکہ معاشی اصلاحات کی بدولت ملک ترقی کی راہ پر گامزن ہے۔
