پاک بحریہ کے تعاون سے پاک چین مشترکہ سمندری سائنسی مہم کا آغاز ہوگیا ہے۔
ترجمان پاک بحریہ کے مطابق پاکستان نیوی، نیشنل ہائیڈروگرافک آفس کے ذریعے پاکستان اور چین کی مشترکہ سمندری تحقیقاتی مہم میں معاونت فراہم کر رہی ہے، یہ تحقیقاتی مہم نیشنل انسٹیٹیوٹ آف اوشیانوگرافی پاکستان اور چین کے سیکنڈ انسٹیٹیوٹ آف اوشیانوگرافی کے باہمی اشتراک سے منعقد کی جارہی ہے۔
یہ بھی پڑھیں: پاک بحریہ کی چوتھی ہنگور کلاس آبدوز غازی کی چین میں کامیاب لانچنگ
اس سائنسی تحقیقی مہم میں معاونت کے لیے پاک بحریہ کا سروے ویسل پی این ایس بحر مساح تعینات کیا گیا ہے، جو ملک میں بحری آگہی کے فروغ اور سمندری سائنسی تحقیق کی سرپرستی کے لیے پاک بحریہ کے عزم کا مظہر ہے۔
یہ مشترکہ سمندری تحقیقاتی مہم پاکستان اور چین کے درمیان سائنسی تعاون کی علامت ہے، جس کا مقصد پاکستانی سمندری حدود میں سمندری ماحول کے حوالے سے بہتر آگاہی کا حصول ہے۔
یہ بھی پڑھیں: پاک چائنا دوستی: چین میں پاک بحریہ کی تیسری ہنگورکلاس آبدوز کی لانچنگ تقریب
اس مہم کے تحقیقی نتائج ملکی ساحلی اور سمندری علاقوں کی بہتر سمجھ بوجھ ،ماحولیاتی رحجانات کے بہتر اندازے اور جامع بحری منصوبہ بندی و پالیسی سازی کے لیے معاون ثابت ہوں گے۔
پاک چین مشترکہ اوشیانوگرافک کروز دونوں ممالک کے مابین مسلسل تعاون کی ایک روشن مثال ہے اور شمالی بحیرۂ عرب کی اوشنو گرافک آگہی میں اہم کردار ادا کرے گا۔
