ویرات کوہلی اپنے اعزازات اور ٹرافیاں اپنی والدہ کو کیوں بھیج دیتے ہیں؟

بھارتی کرکٹ ٹیم کے مایہ ناز بلے باز ویرات کوہلی کا کہنا ہے کہ اب تک کا ان کا شاندار کرکٹ سفر کسی خواب کی تعبیر سے کم نہیں، کیونکہ وہ اپنے کھیل کے ذریعے بے شمار لوگوں کو خوشی اور مسکراہٹ دے پا رہے ہیں۔

37 سالہ ویرات کوہلی نے نیوزی لینڈ کے خلاف پہلے ایک روزہ بین الاقوامی میچ میں ایک اور سنگِ میل عبور کرتے ہوئے بین الاقوامی کرکٹ کی تمام فارمیٹس میں 28 ہزار رنز مکمل کرنے والے تیز ترین کھلاڑی ہونے کا اعزاز حاصل کر لیا۔

یہ بھی پڑھیں: ویرات کوہلی کی انسٹاگرام پوسٹ کیوں وائرل ہو رہی ہے؟

وہ یہ اعزاز حاصل کرنے والے دوسرے بڑے اسکورر ہیں، جب کہ ان سے آگے صرف سچن ٹنڈولکر ہیں۔

کوہلی نے اپنی 624ویں اننگز میں نیوزی لینڈ کے لیگ اسپنر ادیتیہ اشوک کی گیند پر چوکا لگا کر یہ سنگِ میل عبور کیا۔

Question- How many POTM awards you have?

Virat Kohli – Honestly, I have no idea. I send it to my mother in Gurgaon, she likes to keep them. pic.twitter.com/lPcdVGIMxT

— Cricket_Banter (@Chiku_Banter) January 12, 2026

سچن ٹنڈولکر نے یہ ہدف 644 اننگز میں حاصل کیا تھا، جب کہ سری لنکا کے عظیم بلے باز کمار سنگاکارا 28 ہزار رنز کے اس کلب کے تیسرے رکن ہیں، جنہوں نے یہ اعزاز 666 اننگز میں حاصل کیا تھا۔

میچ کے بعد گفتگو کرتے ہوئے ویرات کوہلی نے کہا کہ اگر وہ ایمانداری سے اپنے پورے سفر پر نظر ڈالیں تو یہ کسی خواب کے پورا ہونے سے کم نہیں۔

’میں اپنی صلاحیتوں سے ہمیشہ واقف تھا، لیکن آج جس مقام پر ہوں وہاں پہنچنے کے لیے مجھے بہت محنت کرنا پڑی، خدا نے مجھے بے پناہ نعمتوں سے نوازا ہے، اس لیے شکر کے سوا میرے پاس کچھ نہیں۔‘

میچ کے بہترین کھلاڑی قرار پانے والے کوہلی کو اپنے کیریئر میں 45ویں مرتبہ یہ اعزاز ملا ہے، وہ جہاں بھی کھیلنے جاتے ہیں، شائقینِ کرکٹ کی جانب سے بھرپور محبت اور پذیرائی حاصل کرتے ہیں۔

کوہلی کا کہنا تھا کہ وہ شکر گزار ہیں کہ انہین یہ مقام ملا۔ یہ واقعی ایک نعمت ہے کہ آپ وہ کام جس سے آپ محبت کرتے ہیں سرانجام دیتے ہوئے لاکھوں لوگوں کو خوشی دے سکتے ہیں۔

’میں اپنا خواب جی رہا ہوں اور لوگوں کو خوش دیکھ رہا ہوں، اس سے بڑھ کر اور کیا چاہیے۔‘

گزشتہ روز 91 گیندوں پر 93 رنز کی اننگز کے بارے میں بات کرتے ہوئے، کوہلی نے کہا کہ وہ اس وقت کسی سنگِ میل کے بارے میں نہیں سوچ رہے تھے۔

’اگر ہم پہلے بیٹنگ کر رہے ہوتے تو شاید میں مزید جارحانہ انداز اپناتا، لیکن چونکہ ہدف سامنے تھا اس لیے صورتحال کے مطابق کھیلنا پڑا۔‘

اپنی حالیہ اننگز میں ابتدائی اوورز میں زیادہ جارحانہ انداز اپنانے کے سوال پر کوہلی نے کہا کہ وہ نمبر 3 پر بیٹنگ کرتے ہیں، اس لیے مشکل صورتحال میں وہ اب دفاعی کھیل کے بجائے جوابی حملے پر یقین رکھتے ہیں۔

’کبھی کبھی گیند آپ کے نام کی ہوتی ہے، اس لیے زیادہ انتظار کا فائدہ نہیں۔ البتہ غیر ضروری شاٹس کھیلنے کے بجائے اپنی طاقت پر انحصار کرنا ضروری ہے۔‘

انہوں نے بتایا کہ روہت شرما کے آؤٹ ہونے کے بعد جب وہ بیٹنگ کے لیے آئے تو ابتدائی گیندوں میں دباؤ ڈالنے کا فیصلہ کیا، جس سے شراکت بنی اور یہی میچ کا فیصلہ کن لمحہ ثابت ہوا۔

ویرات کوہلی نے مسکراتے ہوئے یہ بھی بتایا کہ وہ اپنے ٹرافیاں اپنی والدہ کو بھیج دیتے ہیں، جو گڑگاؤں میں رہتی ہیں اور انہیں تمام ایوارڈز سنبھال کر رکھنا پسند ہے۔

بھارتی کپتان شبمن گل نے ویرات کوہلی کی تعریف کرتے ہوئے کہا کہ اس وقت وہ بیٹنگ کو نہایت آسان بنا کر پیش کر رہے ہیں۔

’ایسی پچز پر بیٹنگ کا آغاز کرنا مشکل ہوتا ہے، لیکن کوہلی جو کر رہے ہیں اسے دہرانا آسان نہیں، امید ہے وہ اسی طرح رنز بناتے رہیں گے۔‘

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں