قطر میں سابق بھارتی نیوی افسر کمانڈر پرنندو تیواری کو جاسوسی کے الزام میں ایک بار پھر گرفتار کر لیا گیا ہے۔ بھارتی وزارتِ خارجہ (MEA) نے اس گرفتاری کی تصدیق کی ہے۔ وزارت کے مطابق یہ گرفتاری دسمبر 2025 میں ایک عدالتی فیصلے کے بعد عمل میں آئی۔
وزارتِ خارجہ کا مؤقف
بھارتی وزارتِ خارجہ کے ترجمان رندھیر جیسوال نے میڈیا کو بتایا کہ پرنندو تیواری کو گزشتہ ماہ ایک ایسے مقدمے میں گرفتار کیا گیا جو قطر میں کافی عرصے سے چل رہا تھا۔ اس کیس میں کئی اور افراد بھی گرفتار ہیں، تاہم وہ بھارتی شہری نہیں ہیں۔
انہوں نے کہا ’بھارتی سفارت خانہ تیواری اور ان کے اہلِ خانہ سے مسلسل رابطے میں ہے۔ گرفتاری عدالتی فیصلے کے بعد ہوئی ہے اور چونکہ معاملہ عدالت میں زیرِ سماعت ہے، اس لیے اس سے زیادہ تبصرہ مناسب نہیں۔‘
2022 میں پہلی گرفتاری کا پس منظر
واضح رہے کہ پرنندو تیواری کو اگست 2022 میں قطر میں پہلی مرتبہ گرفتار کیا گیا تھا۔ اس وقت ان کے ساتھ بھارتی نیوی کے مزید 7 سابق افسران کو بھی حراست میں لیا گیا تھا۔ اس وقت وہ بھارتی بحریہ کے 7 دیگر سابق اہلکاروں کے ساتھ ایک نجی دفاعی نوعیت کی کمپنی دہرہ گلوبل ٹیکنالوجیز اینڈ کنسلٹنسی سروسز میں کام کر رہے تھے۔
یہ بھی پڑھیے قطر میں بھارتی آئی ٹی انجینیئر جاسوسی کے الزام میں گرفتار
میڈیا رپورٹس اور دیگر ذرائع کے مطابق ان آٹھوں افراد پر جاسوسی کے الزامات عائد کیے گئے تھے، جن کا تعلق مبینہ طور پر دفاعی نوعیت کے کام اور ممکنہ طور پر حساس فوجی ٹیکنالوجی سے جوڑا گیا۔
سزائے موت اور بھارت کا ردِعمل
اکتوبر 2023 میں قطری عدالت نے ان تمام 8 سابق بھارتی نیوی اہلکاروں کو سزائے موت سنائی تھی، جس پر بھارت نے شدید ردِعمل ظاہر کرتے ہوئے فیصلے کو انتہائی چونکا دینے والا قرار دیا تھا۔
یہ بھی پڑھیے اسرائیل کے لیے جاسوسی ثابت ہونے پر قطر نے بھارتی بحریہ کے 8 سابق اہلکاروں کو سزائے موت سنا دی
بھارتی حکومت کی سفارتی مداخلت کے بعد فروری 2024 میں ان آٹھوں افراد کو رہا کر دیا گیا۔
7 اہلکار وطن واپس، تیواری قطر میں روک لیے گئے
رہائی کے بعد 7 سابق نیوی اہلکار بھارت واپس آ گئے تھے، تاہم پرنندو تیواری کو قطر میں ہی رکنے کا حکم دیا گیا کیونکہ ان کے خلاف کچھ اضافی الزامات کے تحت قانونی کارروائی جاری تھی۔
معاملہ تاحال عدالت میں
وزارتِ خارجہ کے مطابق پرنندو تیواری کا کیس اب بھی عدالت میں زیرِ سماعت ہے اور اسی وجہ سے بھارتی حکومت اس پر مزید تفصیلات فراہم نہیں کر رہی۔
