خیبرپختونخوا کے ضلع ٹانک میں گومل بازار روڈ پر پولیس کی بکتر بند گاڑی کے قریب ریموٹ کنٹرول بم دھماکے کے نتیجے میں پانچ پولیس اہلکار شہید ہو گئے۔
پولیس کے مطابق بکتر بند گاڑی تھانہ گومل سے ٹانک کی جانب جا رہی تھی کہ راستے میں گومل بازار روڈ پر دھماکے کا نشانہ بنی۔ دھماکا اتنا شدید تھا کہ بکتر بند گاڑی مکمل طور پر تباہ ہو گئی۔
پولیس حکام کا کہنا ہے کہ شہید ہونے والے اہلکاروں میں تھانہ گومل کے ایڈیشنل ایس ایچ او اسحاق خان بھی شامل ہیں۔
یہ بھی پڑھیے: لیویز فورس کو قانونی طور پر بلوچستان پولیس میں ضم کردیا گیا
واقعے کے بعد علاقے کو گھیرے میں لے کر سرچ آپریشن شروع کر دیا گیا، جبکہ شہداء کی لاشیں ہسپتال منتقل کر دی گئیں۔ مزید تحقیقات جاری ہیں۔
صدر مملکت اور وفاقی وزیرداخلہ کی ٹانک دھماکے کی مذمت
صدرِ مملکت آصف علی زرداری نے دہشت گرد حملے میں پولیس اہلکاروں کی شہادت پر گہرے دکھ و افسوس کا اظہار کیا۔
انہوں نے شہید پولیس اہلکاروں کی بہادری اور وطن کی خدمت کے جذبے کو خراجِ تحسین پیش کیا۔
وفاقی وزیرداخلہ محسن نقوی نے بھی ٹانک میں پولیس کی بکتر بند گاڑی کے قریب ہونے والے بم دھماکے کی شدید الفاظ میں مذمت کی ہے، جس میں ایڈیشنل ایس ایچ او سمیت 5 پولیس اہلکار جامِ شہادت نوش کر گئے۔
یہ بھی پڑھیے: 2 ہزار کلو بارودی مواد کیس میں گرفتار 3 ملزمان جسمانی ریمانڈ پر پولیس کے حوالے
وفاقی وزیرداخلہ نے دھماکے میں شہید ہونے والے پولیس افسران اور جوانوں کو خراجِ عقیدت پیش کرتے ہوئے ان کے اہلِ خانہ سے دلی ہمدردی اور تعزیت کا اظہار کیا۔
محسن نقوی نے کہا کہ پولیس کے بہادر جوانوں نے اپنا آج قوم کے پُرامن کل پر قربان کیا ہے۔
انہوں نے مزید کہا کہ شہداء کی عظیم قربانیوں کو ہمیشہ یاد رکھا جائے گا۔
وفاقی وزیرداخلہ کا کہنا تھا کہ شہداء ہمارا فخر ہیں اور پوری قوم ان کی لازوال قربانیوں کو کبھی فراموش نہیں کر سکتی۔
محسن نقوی نے اس عزم کا بھی اعادہ کیا کہ دہشتگردی کے خلاف جنگ میں پولیس اور سیکیورٹی فورسز کی قربانیوں کو رائیگاں نہیں جانے دیا جائے گا۔
