چیف آف ڈیفنس فورسز (سی ڈی ایف) فیلڈ مارشل سید عاصم منیر سے ورلڈ لبرٹی فنانشل امریکا کے وفد نے ملاقات کی ہے۔
مزید پڑھیں: سرحد پار ڈیجیٹل مالیاتی نظام: پاکستان اور امریکی کمپنی میں تعاون کا آغاز
پاک فوج کے شعبہ تعلقات عامہ (آئی ایس پی آر) کے مطابق وفد کی قیادت معروف عالمی فِن ٹیک کمپنی کے چیف ایگزیکٹو آفیسر زیکری وِٹکوف نے کی۔
ملاقات میں پاکستان کے ابھرتے ہوئے معاشی منظرنامے میں بین الاقوامی نجی سرمایہ کاری گروپس کی بڑھتی ہوئی دلچسپی پر بات چیت کی گئی۔
اس موقع پر پاکستان کے فِن ٹیک شعبے میں عالمی اعتماد میں اضافے کا اظہار بھی کیا گیا، جبکہ مالی شمولیت کے فروغ اور سرحد پار ڈیجیٹل فنانس کو مضبوط بنانے پر زور دیا گیا۔
وفد کے سربراہ زیکری وِٹکوف نے پاکستان میں موجود وسیع معاشی امکانات کو اجاگر کرتے ہوئے مستقبل کی ٹیکنالوجیز کو اپنانے کے حوالے سے پاکستان کی قیادت کی کوششوں کو سراہا۔
انہوں نے کہاکہ ان اقدامات سے ملک کی معاشی صلاحیتوں کو مکمل طور پر بروئے کار لایا جا سکتا ہے۔
مزید پڑھیں: پاکستان کرپٹو کونسل اور ورلڈ لبرٹی فنانشل کے درمیان معاہدے پر دستخط
اس موقع پر فیلڈ مارشل سید عاصم منیر نے خیالات کے تبادلے کا خیرمقدم کرتے ہوئے پاکستان کے معاشی استحکام، سرمایہ کاروں کے اعتماد اور قومی ترقی میں ذمہ دار نجی شعبے کی شمولیت کے لیے سازگار ماحول فراہم کرنے کے عزم کا اعادہ کیا۔
