وفاقی وزیر داخلہ محسن نقوی کا کہنا ہے کہ اے ایس پیز کی ٹریننگ میں جدید تقاضوں سے ہم آہنگ تربیتی ماڈیولز شامل کیے جائیں گے تاکہ افسران کی پیشہ ورانہ صلاحیتوں اور عملی مہارتوں میں اضافہ ہو سکے۔
وزیر داخلہ محسن نقوی نے اسلام آباد میں نیشنل پولیس اکیڈمی کا دورہ کیا جہاں انہوں نے جاری تزئین و آرائش کے کام کا جائزہ لیا اور کمانڈنٹ نیشنل پولیس اکیڈمی محمد ادریس کو مختلف امور پر ضروری ہدایات جاری کیں۔
یہ بھی پڑھیں: صحافیوں پر تشدد: وزیرداخلہ محسن نقوی کا نوٹس، آئی جی اسلام آباد سے رپورٹ طلب کرلی
اس موقع پر زیرِ تربیت اسسٹنٹ سپرنٹنڈنٹس آف پولیس سے خطاب کرتے ہوئے انہوں نے اعلان کیا کہ پاسنگ آؤٹ کے موقع پر زیرِ تربیت اے ایس پیز کو پلاٹس دیے جائیں گے۔
انہوں نے کہا کہ موجودہ پولیس بیچ کو بین الاقوامی معیار کے مطابق تیار کیا جا رہا ہے اور اس مقصد کے لیے زیرِ تربیت افسران کو ایک ماہ کی تربیت کے لیے بیجنگ بھیجا جائے گا۔
مزید پڑھیں: فیڈرل ہاؤسنگ اتھارٹی کے ڈائریکٹر لینڈ اسلام آباد میں قتل، وزیرِ داخلہ نے رپورٹ طلب کرلی
محسن نقوی نے مزید کہا کہ نیشنل پولیس فاؤنڈیشن کے تعاون سے پولیس افسران کو جدید سہولیات فراہم کی جائیں گی جبکہ افسران کی پروموشن سے متعلق درپیش مسائل بھی ترجیحی بنیادوں پر حل کیے جائیں گے۔
انہوں نے پولیس افسران کی مالی مشکلات کے خاتمے اور تنخواہوں میں بہتری کے لیے خصوصی اقدامات کرنے کے عزم کا اظہار کرتے ہوئے کہا کہ ان کی خواہش ہے کہ ہر پولیس افسر کو بہتر مالی سہولیات میسر ہوں تاکہ وہ یکسوئی کے ساتھ اپنی پیشہ ورانہ ذمہ داریاں انجام دے سکے۔
