وفاقی دارالحکومت کے مرکزی علاقے بلیو ایریا میں وزارتِ ہاؤسنگ کے ذیلی ادارے فیڈرل گورنمنٹ ایمپلائز ہاؤسنگ اتھارٹی (FGEHA) کے ڈائریکٹر لینڈ احسان الہیٰ کو فائرنگ کرکے قتل کر دیا گیا۔
پولیس کے مطابق واقعہ گزشتہ رات پیش آیا جب احسان الہیٰ ایک ہوٹل سے کھانا کھا کر باہر نکلے تو 2 موٹر سائیکل سواروں نے ان پر فائرنگ کر دی۔ انہیں شدید زخمی حالت میں پمز اسپتال منتقل کیا گیا، جہاں وہ زخموں کی تاب نہ لاتے ہوئے جاں بحق ہو گئے۔
مزید پڑھیں: چند گھنٹوں میں اسلام آباد کے معروف مراکز میں 2 افراد قتل
ترجمان ایف جی ای ایچ اے نے واقعے کی مذمت کرتے ہوئے کہا کہ ابتدائی شواہد کے مطابق یہ واقعہ لینڈ مافیا کی جانب سے ٹارگٹ کلنگ معلوم ہوتا ہے۔
ترجمان کے مطابق احسان الہیٰ 2024 سے ایف جی ای ایچ اے میں بطور ڈائریکٹر لینڈ خدمات انجام دے رہے تھے، اور حال ہی میں ان کی کوششوں سے ایف جی ای ایچ اے، ایس سی بی اے پی اور ڈی ایچ اے کے درمیان مارگلہ آرچرڈ منصوبے پر سہ فریقی معاہدہ طے پایا تھا۔
وفاقی وزیرِ ہاؤسنگ ریاض حسین پیرزادہ نے پمز اسپتال کا دورہ کیا، مقتول کے لواحقین سے اظہارِ تعزیت کیا اور قانون نافذ کرنے والے اداروں کو ملزمان کی فوری گرفتاری کی ہدایت دی۔
مزید پڑھیں: میرپور ماتھیلو میں صحافی محمد طفیل ہیدرانی قتل دیرینہ دشمنی کا شاخسانہ قرار
دوسری جانب وزیرِ داخلہ محسن نقوی نے بھی واقعے کا سخت نوٹس لیتے ہوئے آئی جی اسلام آباد سے رپورٹ طلب کر لی۔ انہوں نے حکم دیا کہ قتل کی ہر پہلو سے تحقیقات کی جائیں اور ملزمان کی فوری گرفتاری یقینی بنائی جائے۔
محسن نقوی نے کہا کہ مقتول کے اہلِ خانہ کو انصاف کی فراہمی میں کوئی کسر اٹھا نہ رکھی جائے۔ پولیس نے موقع سے شواہد اکٹھے کرلیے ہیں اور تحقیقات جاری ہیں، تاہم مقدمہ درج کیے جانے کا عمل تاحال مکمل نہیں ہوا۔
مقدمہ درج
اسلام آباد میں ڈائریکٹر (ایف جی ای ایچ اے) احسان الٰہی کے قتل کا مقدمہ مقتول کے بھائی کی مدعیت میں درج کر لیا گیا ہے۔ پولیس کے مطابق احسان الٰہی کو گزشتہ روز تھانہ کوہسار کی حدود میں نامعلوم ملزمان نے فائرنگ کر کے قتل کیا۔
واقعے کے وقت احسان الٰہی اپنے دوست قیصر اشفاق کے ہمراہ لوفولوجی بیکری کے قریب موجود تھے کہ اچانک ملزمان نے ان پر گولیاں چلا دیں۔ پولیس نے مقدمہ درج کر کے واقعے کی تحقیقات کا آغاز کر دیا ہے۔
