پاکستان مسلم لیگ (ن) کے صدر اور سابق وزیرِ اعظم میاں محمد نواز شریف نے وزیرِ دفاع خواجہ محمد آصف اور وزیرِ اعلیٰ پنجاب مریم نواز شریف کے ہمراہ علامہ اقبال انٹرنیشنل ایئرپورٹ لاہور کے اسٹیٹ لاؤنج کا باضابطہ افتتاح کردیا۔
افتتاح کے بعد معزز مہمانوں نے اسٹیٹ لاؤنج کا دورہ کیا، جہاں انہیں تعمیرِ نو اور جدید خطوط پر کی گئی اپ گریڈیشن سے متعلق آگاہ کیا گیا۔
یہ بھی پڑھیں: مسافروں کی کلیئرنس اب چند منٹوں میں مکمل، لاہور ایئرپورٹ پر جدید ’سیلف بورڈنگ مشینیں‘ لگ گئیں
اسٹیٹ لاؤنج کو جدید جدت طرازی کے ساتھ نئی اور خوبصورت شکل دی گئی ہے، جس کا مقصد اہم ملکی و غیر ملکی مہمانوں کو بہتر اور بین الاقوامی معیار کی سہولیات فراہم کرنا ہے۔
تقریب کے دوران سیکریٹری دفاع محمد علی نے مہمانانِ گرامی اور شرکا کا خیر مقدم کیا، جبکہ ڈائریکٹر جنرل پاکستان ایئرپورٹ اتھارٹی نے ایئرپورٹ اپ گریڈیشن منصوبے اور راوی لاؤنج کی تعمیرِ نو پر تفصیلی بریفنگ دی۔
مزید پڑھیں: وزیرداخلہ محسن نقوی اور وزیر اوورسیز پاکستانیز سالک حسین کا لاہور ایئرپورٹ کا اچانک دورہ
اس موقع پر ڈائریکٹر جنرل پاکستان ایئرپورٹ اتھارٹی، ایئر وائس مارشل ذیشان سعید نے بریفنگ دیتے ہوئے بتایا کہ اپ گریڈیشن منصوبے کے تحت راوی لاؤنج، داخلی لابی، مین ہال اور ایئرپورٹ کے دیگر اہم حصوں کی ازسرِ نو تعمیر کی گئی ہے۔
انہوں نے کہا کہ یہ منصوبہ مسافروں کو بین الاقوامی معیار کی سہولیات فراہم کرنے کی جانب ایک اہم قدم ہے اور اس سے ایئرپورٹ کی مجموعی صلاحیت اور خوبصورتی میں نمایاں بہتری آئے گی۔
