اینٹی نارکوٹکس فورس (اے این ایف) نے کراچی انٹرنیشنل ایئر پورٹ سے ابوظہبی جانے والی ملزمہ کے ٹرالی بیگ سے 5 کلو ہیروئن جبکہ پاک افغان بارڈر سے خیبر کے رہائشی 5 ملزمان سے 111 کلو چرس برآمد کرلی۔
ترجمان اے این ایف کے مطابق کراچی مین سُپر ہائی وے کے قریب کراچی کی رہائشی خاتون اور مرد سے 4 کلو چرس برآمد کی گئی ہے۔ افغانستان سے پاکستان بھاری مقدار میں منشیات اسمگلنگ کی کوشش ناکام بناتے ہوئے پاک افغان سرحد سے خیبر کے رہائشی 5 ملزمان سے 111 کلو چرس برآمد کی گئی ہے۔
ترجمان کے مطابق باچا خان ایئرپورٹ سے لندن جانے والے مسافر کے ٹرالی بیگ سے 7 ہزار 640 نشہ آور گولیاں جبکہ کوئٹہ کچلاک بائی پاس کے قریب غیر آباد مکان میں چھپائی گئی 49 کلو چرس برآمد کرلی گئی۔
اے این ایف اہلکاروں نے اسلام آباد موٹر وے ٹول پلازہ کے قریب خیبر کے رہائشی ملزم سے ایک کلو ہیروئن جبکہ اسلام آباد ای الیون میں لاہور کے رہائشی ملزم سے 70 نشہ آور گولیاں بھی برآمد کرلیں۔ گرفتار مُلزمان کیخلاف انسدادِ منشیات ایکٹ کے تحت مقدمات درج کر لیے گئے ہیں۔
