چیف آف ڈیفنس فورسز، فیلڈ مارشل سید عاصم منیر نے کہا ہے کہ مضبوط اور عوام دوست پولیس داخلی سلامتی کے لیے لازمی ہے اور قانون و امن کا نفاذ پولیس کی مقدس ذمہ داری ہے۔ مسلح افواج ہمیشہ پاکستان پولیس کے ساتھ کھڑی رہیں گی۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے نیشنل پولیس اکیڈمی اسلام آباد کا دورہ کیا اور پولیس سروس آف پاکستان کے افسران سے ملاقات کی۔
یہ بھی پڑھیں:فیلڈ مارشل عاصم منیر سے ورلڈ لبرٹی فنانشل کے وفد کی ملاقات، جدید ٹیکنالوجی اپنانے کی پاکستانی کوششوں کو سراہا
اس موقع پر وفاقی وزیر داخلہ محسن نقوی اور وزیر مملکت برائے داخلہ طلال چوہدری بھی موجود تھے۔
دورے کے دوران فیلڈ مارشل عاصم منیر کا کمانڈنٹ نے پُرتپاک استقبال کیا اور پولیس کے مستعد دستے نے گارڈ آف آنر پیش کیا۔ انہوں نے پولیس شہدا کی یادگار پر پھول رکھے اور فاتحہ خوانی کی، جانوں کا نذرانہ پیش کرنے والے افسران و اہلکاروں کو خراج عقیدت پیش کیا۔
فیلڈ مارشل نے دہشتگردی، جرائم اور دیگر سیکیورٹی چیلنجز کے خلاف جدوجہد میں پولیس اہلکاروں کی قربانیوں کی تعریف کی۔
انہوں نے آئی جیز، ایڈیشنل آئی جیز اور دیگر سینیئر افسران سے خطاب میں بین الاداراتی تعاون اور جدید پولیسنگ کی اہمیت پر زور دیا۔
آئی ایس پی آر کے مطابق فیلڈ مارشل نے عوامی اعتماد کو قانون نافذ کرنے والے اداروں کی بنیاد قرار دیتے ہوئے کہاکہ داخلی سلامتی کے لیے مضبوط اور عوام دوست پولیس ناگزیر ہے اور قانون و امن کے قیام کی ذمہ داری پولیس کی مقدس امانت ہے۔
