معروف فوٹو گرافر عرفان احسن نے وزیراعلیٰ پنجاب مریم نواز کے صاحبزادے جنید صفدر کی شادی کے حوالے سے وضاحت دیتے ہوئے کہا ہے کہ یہ شادی مکمل طور پر معمول کے مطابق ہوئی اور اس میں کسی قسم کی خلاف ورزی نہیں ہوئی۔
وی نیوز کو انٹرویو دیتے ہوئے عرفان احسن نے بتایا کہ انہوں نے مہندی، بارات اور ولیمے کے تمام شوٹس خود کیے اور شریف فیملی کی تصاویر ہمیشہ کی طرح خوش لباس اور شاندار آئیں۔
مزید پڑھیں: وزیراعلیٰ مریم نواز نے بیٹے جنید صفدر کی شادی پر 48 لاکھ کے جوڑے پہنے
انہوں نے کہاکہ جنید صفدر تصاویر لینے کے شوقین ہیں اور انہیں معلوم ہے کہ ایک تصویر کس طرح بنانی چاہیے۔
ایک وائرل تصویر جس میں جنید صفدر دلہن پر پھولوں کی پتیاں نچھاور کررہے ہیں، اس کے بارے میں فوٹو گرافر نے بتایا کہ اس اسٹائل میں تصویر بنانے کا آئیڈیا دلہے کا ہی تھا۔
انہوں نے واضح کیاکہ جنید صفدر نے اس شادی میں اپنی پہلی شادی والی شیروانی نہیں پہنی، جیسا کہ سوشل میڈیا پر غلط معلومات گردش کررہی ہیں، کیوں کہ ان کی پہلی شادی کی تصاویر اور ویڈیوز بھی میں نے ہی بنائی تھیں۔
عرفان احسن نے بتایا کہ جنید کی پہلی بیوی عائشہ سیف کے ساتھ تصاویر اور ویڈیوز میں خاندان کی قربت کم دکھائی دیتی تھی، جبکہ اس بار دلہن اپنے خاندان کے ساتھ اچھی طرح گھل مل رہی تھی اور دونوں خاندانوں میں قربت دیکھی گئی۔
انہوں نے کہاکہ وزیراعلیٰ پنجاب مریم نواز شریف نے بھی شادی کے موقع پر تصاویر بنوائیں۔ ولیمے کے دن مریم نواز نے خوبصورت لباس پہنا ہوا تھا جس میں ان کی تصاویر شاندار آئیں۔ ان تصاویر کو مریم نواز کی اجازت اور مشاورت کے بعد سوشل میڈیا پر اپ لوڈ کیا گیا۔
عرفان احسن نے مزید بتایا کہ کیپٹن (ر) صفدر کی تصاویر بھی جلد اجازت کے بعد سوشل میڈیا پر جاری کی جائیں گی۔
انہوں نے مریم اورنگزیب کی سرجری کے بارے میں علم نہ ہونے کا ذکر کرتے ہوئے کہاکہ ان کی زبردست ڈائیٹ کی وجہ سے ان کے دکھنے میں واضح تبدیلی آئی ہے۔
مزید پڑھیں: جنید صفدر کے ولیمے میں ون ڈش کا قانون لاگو ہوا یا نہیں؟ مختلف دعوے سامنے آگئے
’جنید صفدر کی شادی کے تینوں فنکشن کے دوران ہزاروں تصاویر بنائی گئیں، جن میں سے ابھی صرف ایک فیصد تصاویر سوشل میڈیا پر جاری کی گئی ہیں، جبکہ باقی تصاویر اجازت لینے کے بعد اپ لوڈ کی جائیں گی۔‘
