بلوچستان کے برفباری سے متاثرہ علاقوں میں پی ڈی ایم اے نے ریسکیو آپریشن مکمل کر لیا ہے۔ شدید موسمی حالات کے باعث برف میں پھنسنے والی درجنوں گاڑیوں کو بحفاظت نکال کر مسافروں کو محفوظ مقامات پر منتقل کر دیا گیا۔
وزیراعلیٰ بلوچستان سرفراز بگٹی کے معاون برائے سیاسی و میڈیا امور شاہد رند نے بتایا کہ شدید سردی اور برفباری کے دوران سینکڑوں مسافروں کو بروقت ریسکیو کیا گیا، جس کے نتیجے میں قیمتی انسانی جانیں محفوظ رہیں۔
یہ بھی پڑھیں: بلوچستان کے بالائی علاقوں میں شدید برفباری، اہم قومی شاہراہیں بند
انہوں نے کہا کہ پی ڈی ایم اے اور ریسکیو ٹیموں نے مشکل حالات میں پیشہ ورانہ مہارت اور فرض شناسی کا مظاہرہ کیا۔
شاہد رند کے مطابق وزیراعلیٰ بلوچستان میر سرفراز بگٹی نے پی ڈی ایم اے بلوچستان کی مجموعی کارکردگی کو سراہتے ہوئے ریسکیو آپریشن میں حصہ لینے والی تمام ٹیموں کے لیے خراج تحسین پیش کیا ہے۔
وزیراعلیٰ بلوچستان نے ریسکیو آپریشن کی نگرانی کرنے والے افسران اور فیلڈ میں کام کرنے والی ٹیموں کے لیے حسنِ کارکردگی سرٹیفکیٹس دینے کا بھی اعلان کیا ہے۔
یہ بھی پڑھیں: کوئٹہ سمیت بلوچستان کے مختلف علاقوں میں پہلی برفباری، آج مزید کن علاقوں میں برف پڑے گی؟
معاون وزیراعلیٰ نے مزید کہا کہ حکومت بلوچستان قدرتی آفات کے دوران عوام کو بروقت ریلیف فراہم کرنے کے لیے تمام اداروں کو ہمہ وقت متحرک رکھے ہوئے ہے، جبکہ آئندہ بھی ہنگامی صورتحال سے نمٹنے کے لیے پیشگی اقدامات جاری رکھے جائیں گے۔
