بالی ووڈ کے سپر اسٹار شاہ رخ خان کے بیٹے آریان خان بھی اپنے والد کے کروڑوں مداحوں کی طرح آنے والی فلم ’کنگ‘ کے ڈیٹ اناؤنسمنٹ ویڈیو سے خاصے متاثر نظر آئے۔
آریان خان نے اپنے سوشل میڈیا اکاؤنٹ پر شاہ رخ خان کی فلم کے اعلان کی ویڈیو شیئر کرتے ہوئے صرف ایک لفظ لکھا، ‘باپ’ جو ایک طرف والد کے لیے استعمال ہوتا ہے اور دوسری جانب عظمت، رعب اور شان کے اظہار کے طور پر بھی بولا جاتا ہے۔ آریان کا یہ مختصر ردِعمل ویڈیو کے اثر کو خوب بیان کرتا ہے۔
یہ بھی پڑھیے: ’دل والے دلہنیا لے جائیں گے‘ کے 30 سال، شاہ رخ خان اور کاجول کے کرداروں کا مجسمہ لندن میں نصب
شاہ رخ خان نے آج اپنی نئی فلم ’کنگ‘ کی ریلیز ڈیٹ کا باضابطہ اعلان کیا۔ فلم کا دھماکا خیز اعلان ویڈیو ناظرین کے لیے کسی زوردار پنچ سے کم نہیں تھا۔
شاہ رخ خان نے سوشل میڈیا پر فلم کے شاندار مناظر شیئر کرتے ہوئے بتایا کہ ’کنگ‘ 24 دسمبر 2026 کو سینما گھروں میں ریلیز ہوگی۔
اعلان ویڈیو میں شاہ رخ خان کو نہایت طاقتور انداز میں دکھایا گیا ہے، جہاں وہ پھٹی ہوئی سفید قمیص اور خون آلود چہرے کے ساتھ مکمل غلبے اور جارحانہ انداز میں نظر آتے ہیں۔
یہ بھی پڑھیے: سلمان خان اور شاہ رخ خان کا مستقبل کیا؟ ماہر نجوم کی حیران کن پیشگوئی
یاد رہے کہ گزشتہ سال نومبر میں شاہ رخ خان کی 60ویں سالگرہ کے موقع پر فلم ’کنگ‘ کا دلکش ٹائٹل ویڈیو بھی جاری کیا گیا تھا، جس نے مداحوں میں خاصا جوش پیدا کیا تھا۔
فلم ’کنگ‘ کی کاسٹ میں دیپیکا پڈوکون، شاہ رخ خان کی صاحبزادی سہانا خان اور جے دیپ اہلاوت بھی شامل ہیں۔
