رمضان المبارک کے موقع پر پنجاب حکومت نے عوام کے لیے سب سے بڑے ’رمضان نگہبان پیکیج‘ کی منظوری دے دی ہے، جس کے تحت تقریباً ایک کروڑ مستحقین کو مالی ریلیف فراہم کیا جائے گا۔
وزیر اعلیٰ پنجاب مریم نواز شریف کے مطابق 47 ارب روپے کے اس پیکیج کا مقصد مقدس مہینے میں مہنگائی کے بوجھ کو کم کرنا ہے۔
مزید پڑھیں: وزیراعظم نے رمضان پیکج کا تھرڈ پارٹی آڈٹ کروانے کی ہدایت کردی
پیکیج کے تحت پنجاب کے 42 لاکھ مستحق خاندانوں کو فی خاندان 10 ہزار روپے فراہم کیے جائیں گے، جبکہ راشن کارڈ ہولڈرز کے لیے ماہانہ امداد 3 ہزار روپے سے بڑھا کر 10 ہزار روپے کر دی گئی ہے۔
حکومت کی جانب سے 20 لاکھ سے زیادہ ’نگہبان کارڈز‘ جاری کیے جائیں گے، جن کے ذریعے نقد رقم وصول کرنا اور اشیائے ضروریہ خریدنا ممکن ہوگا۔
مستحقین یہ رقم بینک آف پنجاب کے برانچ لیس بینکنگ ایجنٹس اور ون لنک نیٹ ورک سے منسلک کسی بھی اے ٹی ایم سے نکلوا سکیں گے۔
صوبے بھر میں کارڈز کی فعال سازی کے لیے 136 مراکز قائم کیے جائیں گے، جبکہ ضلعی انتظامیہ کو ہدایت کی گئی ہے کہ وہ گھر گھر جا کر مستحقین کو کارڈ فراہم کریں تاکہ عوام کو طویل لائنوں میں انتظار نہ کرنا پڑے۔
مزید براں ہر تحصیل میں 8 ’نگہبان دسترخوان‘ قائم کیے جائیں گے، جہاں روزانہ 2 ہزار افراد کو باعزت انداز میں افطاری فراہم کی جائے گی۔ صوبے کے 30 اضلاع میں 65 سہولت بازار فعال رہیں گے اور دیگر علاقوں میں عارضی بازار بھی لگائے جائیں گے۔
اس پورے عمل کی نگرانی کے لیے ’رمضان نگہبان ڈیش بورڈ‘ تیار کیا گیا ہے، اور حکام کارڈ ہولڈرز کو کال کر کے امداد کی وصولی کی تصدیق کریں گے تاکہ کسی بھی بدعنوانی کو روکا جا سکے۔
مزید پڑھیں: رمضان پیکج پر اضافی رقم لینے پر 3 ایجنٹس گرفتار، بلیک لسٹ کر دیے گئے
وزیر اعلیٰ پنجاب مریم نواز شریف نے کہاکہ رمضان المبارک میں کوئی بھی مستحق خاندان خود کو تنہا محسوس نہ کرے اور حکومت ہر دکھ سکھ میں غریب عوام کے ساتھ کھڑی ہے۔
