کراچی میں صدر کے تجارتی علاقے میں قائم ایک موبائل مارکیٹ میں آتشزدگی کا واقعہ پیش آیا جس پر فائر بریگیڈ نے بروقت کارروائی کرتے ہوئے قابو پا لیا، جبکہ عمارت میں موجود افراد کو محفوظ طریقے سے باہر نکال لیا گیا۔
میڈیا رپورٹس کے مطابق صدر کے علاقے میں واقع النجیبی موبائل مارکیٹ کے ساتویں فلور پر اچانک آگ بھڑک اٹھی۔ آگ بجھانے کے لیے فائر بریگیڈ کی 4 گاڑیاں موقع پر پہنچیں اور کارروائی میں حصہ لیا۔
گل پلازہ کے قریب ایک اور عمارت میں آگ لگ گئی کراچی میں اوسطاً سال بھر میں 3 ہزار کے قریب آگ لگنے کے چھوٹے بڑے واقعات ہوتے ہیں pic.twitter.com/eLxrRuEVXe
— Faizullah Khan فیض (@FaizullahSwati) February 2, 2026
صورتحال کے پیش نظر اردگرد کی سڑکوں کو عارضی طور پر ٹریفک کے لیے بند کر دیا گیا جبکہ گاڑیوں کو بمبینو چوک سے گرامر اسکول اور گلزار چوک سے ایمپریس مارکیٹ کی جانب متبادل راستوں پر منتقل کیا گیا۔
فائر بریگیڈ حکام کے مطابق بلند منزل ہونے کے باعث اسنارکل بھی طلب کی گئی، جبکہ عمارت میں پھنسے افراد کو بحفاظت باہر نکال لیا گیا۔ آگ کی لپیٹ میں آ کر متعدد گاڑیاں بھی متاثر ہوئیں۔ ریسکیو 1122 کی ٹیموں نے عمارت میں داخل ہو کر سرچ آپریشن شروع کیا۔
حکام کا کہنا ہے کہ آتشزدگی کے نتیجے میں تین گاڑیاں مکمل طور پر جل گئیں، جبکہ دھوئیں سے متاثر ہونے والے دو افراد کو طبی امداد فراہم کرنے کے بعد گھر روانہ کر دیا گیا۔
واقعے کی اطلاع ملتے ہی میئر کراچی مرتضیٰ وہاب بھی موقع پر پہنچے اور اسنارکل کے ذریعے عمارت کے بالائی حصے کا معائنہ کیا۔
ادھر وزیراعلیٰ سندھ مراد علی شاہ نے آگ پر قابو پانے پر ریسکیو اداروں کی کارکردگی کو سراہتے ہوئے کہا کہ حادثات کی صورت میں جان و مال کے تحفظ کو یقینی بنانے کے لیے مزید مستعدی سے کام کیا جائے۔ انہوں نے ہدایت کی کہ ایسے واقعات کے دوران کراؤڈ مینجمنٹ اور ٹریفک کی روانی کو بہتر بنایا جائے تاکہ عوام کو کم سے کم مشکلات کا سامنا کرنا پڑے۔
