چیف آف آرمی اسٹاف جنرل سید عاصم منیر نے کہا ہے کہ عدم استحکام پیدا کرنے کے لیے اندرونی سازشی عناصر اور بیرونی قوتوں کے درمیان گٹھ جوڑ پاکستانی عوام کے سامنے بے نقاب ہو چکا ہے۔ پاکستان کے عوام اور اس کی مسلح افواج کے درمیان مضبوط بندھن کو کبھی نہیں ٹوٹنے دیں گے۔
افواج پاکستان کے محکمہ تعلقات عامہ (آئی ایس پی آر) کی جانب سے جاری پریس ریلیز میں کہا گیا ہے کہ چیف آف آرمی اسٹاف جنرل سید عاصم منیر نے پیر کو کوئٹہ گیریزن کا دورہ کیا جہاں انہوں نے کمانڈ اینڈ اسٹاف کالج کوئٹہ کے افسران سے خطاب کیا۔
آرمی چیف جنرل سید عاصم منیر کوئٹہ گیریژن کا دورہ، آئی ایس پی آر
آرمی چیف نے کمانڈ اینڈ سٹاف کالج کوئٹہ کے افسران سے خطاب کیا،آئی ایس پی آر
آرمی چیف نے روایتی اور ففتھ جنریشن وار فیئر کیلئے آپریشن تیاریوں پر زور دیا
عوام اور مسلح افواج کے رشتے کو کمزور کرنیوالوں کی کوششیں کامیاب… pic.twitter.com/6mLGLDuVf2— PTV News (@PTVNewsOfficial) May 29, 2023
آئی ایس پی آر کے مطابق چیف آف آرمی اسٹاف نے افسران سے خطاب کرتے ہوئے روایتی، غیر روایتی اور ففتھ جنریشن وارفیئر کے لیے آپریشنل تیاریوں پر زور دیا۔
چیف آف آرمی اسٹاف نے خطاب میں مزید کہا کہ ‘جو لوگ پاکستان کے عوام اور اس کی مسلح افواج کے درمیان قائم مضبوط بندھن کو کمزور کرنے کی ناکام کوششیں کر رہے ہیں وہ انشاء اللہ کبھی کامیاب نہیں ہو سکیں گے۔
آرمی چیف نے کہا کہ پاکستان کی مسلح افواج ہمیشہ پاکستان کے بہادر اور قابل فخر لوگوں کی مقروض ہیں جنہوں نے ملک کے طول و عرض میں اپنی مسلح افواج سے اپنی لازوال محبت کا اظہار کر کے دشمن اور ان کے ساتھیوں کے مذموم عزائم کا منہ توڑ جواب دیا ہے۔
چیف آف آرمی اسٹاف نے مزید کہا کہ پاک فوج دنیا کی مضبوط ترین افواج میں سے ایک ہے۔ پاکستانی افواج دُنیا کی بہترین افواج ہونے کے ناطے اللہ تعالیٰ کے فضل و کرم اور اہل پاکستان کی بے مثال حمایت اور محبت سے اسے نہ تو کوئی اپنے مشن سے ہٹا سکتا ہے اور نہ ہی مجبورکر سکتا ہے۔
آرمی چیف نے کوئٹہ گیریزن میں فوجیوں کے لیے شروع کی گئی مختلف فلاحی اسکیموں کا بھی دورہ کیا۔ اس موقع پر کور کمانڈر کوئٹہ نے ان کا پرتپاک استقبال کیا۔
