وزیراعلیٰ پنجاب مریم نواز نے بلوچستان کے دورے کے دوران سیکیورٹی فورسز کے لیے 10 ارب روپے کی مالی معاونت کا اعلان کیا۔
یہ اعلان انہوں نے ایف سی ہیڈکوارٹرز میں منعقدہ تقریب کے دوران کیا۔
مزید پڑھیں: ملک میں دہشتگردی کی نئی لہر، سینیئر صحافیوں نے اہم تجاویز دے دیں
دورہ کے دوران مریم نواز نے وزیراعلیٰ سیکریٹریٹ کا بھی دورہ کیا، جہاں انہیں وزیراعلیٰ بلوچستان سرفراز بگٹی، صوبائی کابینہ اور اراکین اسمبلی نے شاندار انداز میں خوش آمدید کہا۔
اپنے خطاب میں مریم نواز نے کہاکہ بلوچستان کے عوام کا حوصلہ اور پاکستان سے وابستگی قابل ستائش ہے، اور بلوچستان کو درپیش چیلنجز میں حکومت پنجاب ہر ممکن تعاون فراہم کرے گی۔
انہوں نے کہاکہ دہشتگردی کا خاتمہ قومی یکجہتی کے ذریعے ممکن ہے اور بلوچستان میں امن، استحکام اور خوشحالی دیکھنا چاہتے ہیں۔
وزیراعلیٰ پنجاب نے مزید کہاکہ بلوچستان کو فتنہ نہیں بلکہ فتنہ الخوارج کا سامنا ہے، اور اس کے خلاف آپریشن میں پنجاب کی جانب سے ہر ممکن تعاون فراہم کیا جائے گا۔
انہوں نے یقین دلایا کہ بلوچستان کے لیے پنجاب کے وسائل اور خدمات ہر وقت دستیاب ہیں اور دعا ہے کہ دہشت گردی کا جلد خاتمہ ہو۔
مزید پڑھیں: ملک میں دہشتگردی کی نئی لہر کے پیچھے پی ٹی آئی ہے، وزیر اطلاعات عطااللہ تارڑ
وزیراعلیٰ بلوچستان سرفراز بگٹی نے مریم نواز کا صوبے میں خیرمقدم کرتے ہوئے کہا کہ سکیورٹی فورسز کے لیے 10 ارب روپے کی مالی معاونت ایک مثبت اور قابل تحسین اقدام ہے، اور بلوچستان میں حکومت اور اپوزیشن عوامی فلاح کے لیے متحد ہیں۔
