برطانوی شہزادہ ولیم کا سعودی عرب کا دورہ، فٹبالرز اور گیمرز سے ملاقات

برطانیہ کے شہزادہ ولیم نے سعودی عرب کے دورے کے دوران خواتین فٹبالرز سے ملاقات کی، ویڈیو گیمز کھیلے اور ایک کیفے میں شہریوں سے غیر رسمی گفتگو کی۔

یہ بھی پڑھیں: سعودی عرب میں پاکستانی مٹھائیوں کی دھوم

عرب نیوز کے مطابق اپنے دورے کے دوسرے روز منگل کو شہزادہ ولیم نے سعودی عرب میں شہری ترقی کے ایک منصوبے کا دورہ کیا جہاں انہوں نے مقامی لڑکیوں کی یوتھ فٹبال ٹیموں کی پریکٹس دیکھی۔ اس کے بعد انہوں نے ایک ای اسپورٹس ٹورنامنٹ میں بھی شرکت کی۔

ریاض کے ایک اسپورٹس کمپلیکس کے دورے کے دوران شہزادہ ولیم نے فٹبال کھیلتے ہوئے اپنی مہارت کا مظاہرہ کیا اور 2 گول بھی کیے۔

برطانوی نشریاتی ادارے اسکائی نیوز کی جانب سے جاری کردہ ویڈیو فوٹیج میں انہیں کھلاڑیوں کے ساتھ خوشگوار انداز میں کھیلتے ہوئے دیکھا جا سکتا ہے۔

مزید پڑھیے: سعودی عرب میں ابھرتی معیشتوں کی العلا کانفرنس 2026 کا آغاز، عالمی اقتصادی چیلنجز پر غور

اس موقعے پر شہزادہ ولیم نے سعودی وزیرِ کھیل شہزادہ عبدالعزیز بن ترکی الفیصل اور سعودی ای اسپورٹس فیڈریشن کے چیئرمین شہزادہ فیصل بن بندر بن سلطان سے بھی ملاقات کی۔

شہزادہ ولیم پیر کی شام ریاض پہنچے تھے جہاں ان کا استقبال ولی عہد شہزادہ محمد بن سلمان نے کیا۔

مزید پڑھیں: سعودی عرب امریکا کے بعد بوئنگ کا بڑا شراکت دار، عالمی دفاعی نمائش میں انکشاف

ملاقات کے دوران سعودی ولی عہد نے برطانوی شاہی خاندان کے ولی عہد کو درعیہ میں واقع یونیسکو عالمی ثقافتی ورثہ سائٹ کا نجی دورہ بھی کرایا جو سعودی ریاست کا پہلا دارالحکومت تھا۔