وزیراعلیٰ پنجاب مریم نواز نے ایف سی ہیڈکوارٹرز کوئٹہ میں تقریب سے خطاب کرتے ہوئے کہا کہ بلوچستان اکیلا نہیں بلکہ پنجاب اس کے ساتھ ہے، اور جو بھی پنجاب کے پاس ہے ہم آپ کے ساتھ بانٹیں گے۔
انہوں نے کہا کہ جب مجھے پتہ چلا کہ ایف سی کو 10 ارب روپے کی ضرورت ہے، تب میں نے یہ رقم پنجاب کی طرف سے دینے کا فیصلہ کیا تاکہ فورس کی صلاحیتوں میں اضافہ ہو سکے۔ پاکستان کا کوئی دشمن ہمارا کچھ نہیں بگاڑ سکتا اگر ہم ایک قوم بن کر رہیں۔
یہ بھی پڑھیے: وزیر اعلیٰ پنجاب مریم نواز شریف کی کوئٹہ آمد، پرتپاک استقبال
انہوں نے کہا کہ ہمیں آپ کی مشکلات کا اندازہ بھی نہیں، ایف سی مشکلات میں اپنی ذمہ داریاں ادا کر رہی ہے۔ آپ کی قربانیوں کو پنجاب کی طرف سے سلام پیش کرتی ہوں۔ اللہ تعالیٰ نے آپ کو چٹان جیسا حوصلہ دیا ہے۔
مریم نواز نے کہا کہ دشمن بہت تیاری کے ساتھ حملہ کر رہا ہے، اور اب وقت آ گیا ہے کہ سیاہ کو سیاہ اور سفید کو سفید کہا جائے اور واضح موقف اپنایا جائے۔ عوام اور سیاستدانوں کے ذہنوں میں کوئی ابہام نہیں ہونا چاہیے۔ جو پاکستان کو کمزور کرتا ہے، وہ پاکستان کا بدترین دشمن ہے، چاہے وہ اندر سے ہو یا باہر سے۔
وزیراعلیٰ نے کہا کہ ہمیں ففتھ جنریشن وار کا سامنا ہے، ہر کسی کے ہاتھ میں اسکرین ہے، دشمن نے ہمارے ذہنوں پر حملہ کر دیا ہے۔ اس جنگ کا ہتھیار بندوق نہیں بلکہ بیانیہ ہے۔ 18ویں ترمیم نے ہمیں انتظامی خودمختاری دی ہے، گروہ بندی میں بٹنے کا نہیں۔
یہ بھی پڑھیے: بلوچستان کی طرف اٹھنے والی ہر آنکھ نکال لی جائےگی، وزیراعلیٰ پنجاب مریم نواز
مریم نواز نے کہا کہ اسلام آباد میں افسوسناک واقعہ ہوا، اس طرح کے ظالم کا ہمیں سامنا ہے جو نمازیوں کو بھی نہیں بخشتا۔ جس دن اسلام آباد میں حملہ ہوا، میں نے کہا کہ بطور قوم سخت فیصلہ کرنا پڑے گا۔ کوئی ابہام نہیں ہونا چاہیے اور انہیں ختم کر دینا چاہیے۔ لاکھ وجوہات ہوں، لیکن ملک کے خلاف ہتھیار اٹھانے والا ہمارا دشمن ہے۔
انہوں نے کہا کہ بلوچستان کی خواتین اور نوجوانوں کو میرا پیغام ہے کہ ہر اس چیز کا انکار کریں جو قوم اور ملک کے خلاف ہو۔ بلوچستان کی ذمہ داری آپ کو اپنے ہاتھ میں لینا چاہیے۔
