محکمہ موسمیات نے ملک کے مختلف حصوں میں تیز ہواؤں اور بارش کی پیشگوئی کرتے ہوئے شہریوں کو احتیاط برتنے کی ہدایت کی ہے۔ بعض علاقوں میں گرج چمک اور ژالہ باری کا بھی امکان ظاہر کیا گیا ہے۔
رپورٹ کے مطابق بلوچستان کے بیشتر اضلاع میں موسم تبدیل ہونے کا امکان ہے۔ کوئٹہ، چمن، پشین، مسلم باغ، ژوب، زیارت، بارکھان، سبی، قلات، کیچ، پنجگور، واشک، خاران، لسبیلہ اور خضدار میں بارش متوقع ہے، جبکہ گوادر میں چند مقامات پر بارش کے ساتھ ژالہ باری بھی ہو سکتی ہے۔
یہ بھی پڑھیے: محکمہ موسمیات نے ملک کے مختلف علاقوں میں بارشوں کی پیش گوئی کردی
سندھ کے مختلف شہروں کراچی، دادو، جامشورو، لاڑکانہ، جیکب آباد اور حیدرآباد میں بھی چند مقامات پر بارش کی پیشگوئی کی گئی ہے۔ اسی طرح خیبر پختونخوا کے علاقوں ڈیرہ اسماعیل خان، وزیرستان، ٹانک، لکی مروت، کرک اور پاراچنار میں بارش کا امکان ظاہر کیا گیا ہے۔
پنجاب کے جنوبی اور وسطی اضلاع بھی اس موسمی نظام کی لپیٹ میں آ سکتے ہیں۔ ڈیرہ غازی خان، بھکر، لیہ، بہاولپور اور بہاولنگر میں بارش کی توقع ہے، جبکہ ملتان، خانیوال اور ساہیوال سمیت گرد و نواح میں بھی بارش ہو سکتی ہے۔
وفاقی دارالحکومت اسلام آباد میں آج مطلع جزوی طور پر ابر آلود رہنے کا امکان ہے۔ گلگت بلتستان میں موسم سرد اور جزوی طور پر ابر آلود رہنے کی پیشگوئی ہے، جبکہ آزاد کشمیر کے چند علاقوں میں تیز ہواؤں اور گرج چمک کے ساتھ بارش متوقع ہے۔
یہ بھی پڑھیے: ملک کے مختلف علاقوں میں تیز ہواؤں اور گرج چمک کے ساتھ بارش متوقع
محکمہ موسمیات کے مطابق شہری موسمی صورتحال کے پیش نظر غیر ضروری سفر سے گریز کریں اور کسی بھی ہنگامی صورتحال میں متعلقہ اداروں کی ہدایات پر عمل کریں۔
