ڈسٹرکٹ اینڈ سیشن کورٹ اسلام آباد نے 26 نومبر احتجاج کیس میں بانی پی ٹی آئی عمران خان کی اہلیہ بشریٰ بی بی کی عبوری ضمانت میں توسیع کرتے ہوئے انہیں گرفتار کرنے سے روک دیا۔
یہ بھی پڑھیں: عمران خان سے بشریٰ بی بی کی اڈیالہ جیل میں 30 منٹ تک ملاقات
بانی پاکستان تحریک انصاف کی اہلیہ کی ضمانت کی درخواست پر سماعت 24 فروری تک ملتوی کر دی گئی۔ بشریٰ بی بی کے خلاف تھانہ رمنا میں مقدمہ درج ہے۔
دوسری جانب راولپنڈی کی انسدادِ دہشتگردی عدالت نے مسلسل غیر حاضری کے باعث عمران خان کی ہمشیرہ علیمہ خان کے ناقابلِ ضمانت وارنٹِ گرفتاری جاری کردیے۔ عدالت نے علیمہ خان کی حاضری سے استثنیٰ کی درخواست مسترد کرتے ہوئے پولیس کو وارنٹ پر عمل درآمد کی ہدایت کی۔
یہ بھی پڑھیں: عمران خان نے کہہ کر بھیجا ہے بہنوں کو کہو میرے لیے آواز اٹھائیں، علیمہ خان
پراسیکیوٹر ظہیر شاہ نے عدالت کو آگاہ کیا کہ علیمہ خان کے خلاف مقدمے میں 2 گواہان پر جرح باقی ہے جبکہ دیگر 16 گواہان پر جرح مکمل ہوگئی ہے۔ انہوں نے کہا کہ ملزمہ مسلسل ٹرائل میں رخنہ ڈالنے کی کوشش کررہی ہیں۔
