پاکستان شوبز انڈسٹری کی مقبول اداکارہ و ماڈل ہانیہ عامر نے سوشل میڈیا پلیٹ فارم انسٹاگرام پر ایک نیا سنگِ میل عبور کرلیا ہے اور فالوورز کی تعداد کے اعتبار سے ملک کی سب سے زیادہ فالو کی جانے والی اداکارہ بن گئی ہیں۔
تفصیلات کے مطابق ہانیہ عامر کے انسٹاگرام اکاؤنٹ پر فالوورز کی تعداد 19.7 ملین تک جا پہنچی ہے۔ جس کے بعد انہوں نے دیگر تمام پاکستانی اداکاراؤں کو پیچھے چھوڑ دیا ہے۔ سوشل میڈیا پر ان کی مقبولیت میں مسلسل اضافہ دیکھا جا رہا ہے اور مداحوں کی بڑی تعداد ان کی تصاویر، ویڈیوز اور پروفیشنل مصروفیات کو بے حد پسند کرتی ہے۔
اس سے قبل یہ اعزاز معروف اداکارہ عائزہ خان کے پاس تھا جو طویل عرصے تک انسٹاگرام پر پاکستان کی سب سے زیادہ فالو کی جانے والی اداکارہ رہیں۔ تاہم موجودہ اعداد و شمار کے مطابق عائزہ خان کے فالوورز کی تعداد 14.8 ملین ہے اور وہ اب اس فہرست میں دوسرے نمبر پر موجود ہیں۔
سوشل میڈیا پر بڑھتی ہوئی مقبولیت کو فنکاروں کی شہرت اور اثر و رسوخ کا اہم پیمانہ سمجھا جاتا ہے اور اس کامیابی کے بعد ہانیہ عامر نے ڈیجیٹل پلیٹ فارمز پر بھی اپنی مضبوط موجودگی ثابت کر دی ہے۔
