خیبر پختونخوا کے ضلع کوہاٹ میں پولیس کی گاڑی پر فائرنگ کے نتیجے میں ڈپٹی سپرنٹنڈنٹ آف پولیس (ڈی ایس پی) لاچی اسد محمود اور 4 پولیس اہلکار شہید ہو گئے۔ واقعے میں پولیس کی حراست میں موجود دو مشتبہ افراد بھی ہلاک ہو گئے۔
کوہاٹ کے ڈسٹرکٹ پولیس آفیسر (ڈی پی او) نے واقعے کی تصدیق کرتے ہوئے بتایا کہ حملہ شکر درہ روڈ پر پیش آیا، جہاں نامعلوم مسلح افراد نے ڈی ایس پی کی گاڑی کو نشانہ بنایا۔ زخمی اہلکاروں کو اسپتال منتقل کیا جا رہا تھا کہ راستے میں وہ دم توڑ گئے۔
مزید پڑھیں: خیبر پختونخوا کے سیکیورٹی ڈپازٹ اکاؤنٹس میں 8 ارب سے زائد کی بے قاعدگیوں کا انکشاف
پولیس کے مطابق حملہ آور فرار ہونے میں کامیاب ہو گئے، تاہم علاقے میں سرچ آپریشن جاری ہے۔
یہ واقعہ گزشتہ 24 گھنٹوں کے دوران جنوبی اضلاع میں دہشت گردی کا دوسرا حملہ ہے۔ اس سے قبل ضلع کرک میں دہشت گردوں نے ڈرون کے ذریعے فیڈرل کانسٹیبلری کی پوسٹ کو نشانہ بنایا، جس میں 5 اہلکار زخمی ہوئے۔ ریسکیو ایمبولینس کے ذریعے اسپتال منتقل کیے جانے کے دوران ایمبولینس پر بھی فائرنگ کی گئی، جس کے نتیجے میں 3 زخمی اہلکار شہید ہو گئے۔
مزید پڑھیں: سپریم کورٹ: جائیداد کی ملکیت سے متعلق کیس میں خیبر پختونخوا حکومت کی اپیلیں ناقابلِ سماعت قرار
پولیس نے عوام سے اپیل کی ہے کہ وہ مشکوک سرگرمیوں کی اطلاع فوراً متعلقہ حکام کو دیں تاکہ مزید جانوں کے ضیاع سے بچا جا سکے۔
