وزیراعظم شہباز شریف سے قطر کے وزیر مملکت برائے خارجہ تجارت ڈاکٹر احمد بن محمد السید نے ملاقات کی۔ ڈاکٹر احمد بن محمد السید پاکستان قطر جوائنٹ بزنس ٹاسک فورس کے چیئرمین بھی ہیں۔ دونوں رہنماؤں نے دوطرفہ تجارتی اور اقتصادی تعاون کا جائزہ لیا اور پاکستان و قطر کے تعلقات میں بڑھتی ہوئی رفتار پر اطمینان کا اظہار کیا۔
مزید پڑھیں: وزیراعظم شہباز شریف 2 روزہ دورے پر قطر پہنچ گئے، ایئرپورٹ پر استقبال
وزیراعظم نے دوطرفہ تجارتی حجم میں اضافے پر زور دیتے ہوئے کہا کہ قطر کو پاکستان کی برآمدات، خصوصاً زرعی مصنوعات، کھانے پینے کی اشیاء اور ویلیو ایڈڈ مصنوعات کی برآمدات کو مزید متنوع بنایا جائے۔ دونوں فریقین نے پاکستان قطر مشترکہ وزارتی کمیشن کے چھٹے اجلاس کے فیصلوں پر عملدرآمد کے عزم کا اعادہ بھی کیا۔
قطر کے وزیر مملکت برائے خارجہ تجارت ڈاکٹر احمد بن محمد السید نے آج صبح وزیراعظم پاکستان محمد شہباز شریف سے ملاقات کی۔ عزت مآب ڈاکٹر احمد بن محمد السید پاکستان-قطر جوائنٹ بزنس ٹاسک فورس کے چیئرمین بھی ہیں۔@Aadiiroy2 @AmirSaeedAbbasi @pmln_org #Qatar pic.twitter.com/0zzbmO27ih
— Media Talk (@mediatalk922) February 24, 2026
وزیراعظم نے سرمایہ کاری دوست اصلاحات اور غیر ملکی سرمایہ کاری کے فروغ میں خصوصی سرمایہ کاری سہولت کونسل (SIFC) کے کردار پر روشنی ڈالی۔
اس موقع پر ڈاکٹر احمد بن محمد السید نے اقتصادی تعاون کو وسعت دینے اور دونوں ممالک کے نجی شعبوں کے درمیان روابط مضبوط بنانے میں قطر کی دلچسپی کا اظہار کیا۔
مزید پڑھیں: قطر کا نیا 10 سالہ اقامہ کن افراد کے لیے ہے اور اس کے کیا کیا فوائد ہیں؟
دونوں ممالک نے رمضان المبارک کے دوران متعلقہ حکام پر مشتمل ٹاسک فورس کا اجلاس بلانے پر بھی اتفاق کیا، جس میں پاکستان میں قطری سرمایہ کاری کے لیے ٹھوس تجاویز پر غور کیا جائے گا۔
ملاقات میں پاکستان اور قطر کے درمیان تجارت، سرمایہ کاری اور صنعتی تعاون کو مزید گہرا کرنے کے مشترکہ عزم کا اظہار کیا گیا۔ اجلاس میں نائب وزیراعظم و وزیر خارجہ، وفاقی وزیر اطلاعات و نشریات اور وزیراعظم کے معاون خصوصی بھی موجود تھے۔
