آپریشن سوئفٹ ریٹارٹ کی 7ویں سالگرہ کے موقع پر فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف و چیف آف ڈیفنس اسٹاف؛ ایڈمرل نوید اشرف، نشانِ امتیاز، نشانِ امتیاز (ملٹری)، تمغۂ بسالت، چیف آف دی نیول اسٹاف؛ اور ایئر چیف مارشل ظہیر احمد بابر سدھو، نشانِ امتیاز (ملٹری)، ہلالِ جرات، چیف آف ایئر اسٹاف نے پاکستان کی مسلح افواج کی جانب سے افسران اور جوانوں کی جرات، پیشہ ورانہ مہارت اور عظیم قربانیوں کو زبردست خراجِ تحسین پیش کیا۔
مزید پڑھیں:’آپریشن سوئفٹ ریٹارٹ‘کے 6 سال مکمل ہونے پر آئی ایس پی آر کی جانب سے نیا نغمہ ریلیز
آئی ایس پی آر کے مطابق 27 فروری 2019 کو شروع کیا گیا آپریشن سوئفٹ ریٹارٹ بھارت کی بلااشتعال جارحیت کے جواب میں ایک مؤثر اور فیصلہ کن کارروائی تھی، جس نے پاکستان کے اس غیرمتزلزل عزم کو دنیا پر آشکار کیا کہ وہ اپنی خودمختاری اور علاقائی سالمیت کے دفاع کے لیے ہر سطح پر تیار ہے۔
اس آپریشن نے مسلح افواج کی اعلیٰ تربیت، ہمہ وقت تیاری اور مربوط حکمتِ عملی کا عملی مظاہرہ کیا، جس کے نتیجے میں مزید کشیدگی کا راستہ روکا گیا اور خطے میں اسٹریٹجک توازن بحال ہوا۔
مزید پڑھیں:آپریشن سوئفٹ ریٹارٹ پاک فوج کی مکمل برتری کا مظہر ہے، آئی ایس پی آر
فیلڈ مارشل اور سروسز چیفس نے اس امر کا اعادہ کیا کہ پاکستان کی مسلح افواج قومی سلامتی اور علاقائی امن کے قیام کے لیے پوری طرح مستعد ہیں۔
انہوں نے واضح کیا کہ بری، بحری اور فضائی افواج ہر قسم کے خطرات کا مؤثر جواب دینے کی مکمل صلاحیت رکھتی ہیں اور دفاعِ وطن کے ساتھ ساتھ عالمی امن و استحکام کے فروغ میں بھی اپنا فعال کردار جاری رکھیں گی۔
