ایران کے سابق شاہی خاندان کے رکن رضا پہلوی نے آیت اللہ علی خامنہ ای کی ہلاکت کے بعد سوشل میڈیا پر جاری اپنے بیان میں کہا ہے کہ ‘علی خامنہ ای کو تاریخ کے صفحے سے مٹا دیا گیا ہے’ اور ان کی موت کے ساتھ ہی ‘اسلامی جمہوریہ عملاً اپنے انجام کو پہنچ چکی ہے اور بہت جلد تاریخ کے کوڑے دان میں پھینک دی جائے گی’۔
رضا پہلوی نے اپنے بیان میں کہا کہ حکومت کے باقی ماندہ عناصر اگر خامنہ ای کا کوئی جانشین مقرر کرنے کی کوشش کریں گے تو وہ ابتدا ہی سے ناکام ہوگی۔ ان کا کہنا تھا کہ ‘جسے بھی ان کی جگہ بٹھایا جائے گا، اسے نہ تو عوامی جواز حاصل ہوگا اور نہ ہی وہ زیادہ عرصہ برقرار رہ سکے گا، اور وہ بھی اس نظام کے جرائم میں شریک سمجھا جائے گا’۔
یہ بھی پڑھیے: امریکی اور اسرائیلی حملے میں جاں بحق ہونے والے ایرانی سپریم لیڈر آیت اللہ خامنہ ای کی زندگی پر ایک نظر
انہوں نے ایرانی فوج، قانون نافذ کرنے والے اداروں اور سیکیورٹی فورسز کو مخاطب کرتے ہوئے کہا کہ ‘زوال پذیر نظام کو بچانے کی کوئی بھی کوشش ناکام ہوگی۔ یہ آپ کے لیے آخری موقع ہے کہ قوم کا ساتھ دیں اور ایران کو ایک آزاد اور خوشحال مستقبل کی طرف لے جانے میں کردار ادا کریں’۔
My fellow compatriots,
Ali Khamenei, the bloodthirsty despot of our time, the murderer of tens of thousands of Iran’s bravest sons and daughters, has been erased from the face of history. With his death, the Islamic Republic has in effect reached its end and will very soon be… https://t.co/pm3ZXY9IYZ
— Reza Pahlavi (@PahlaviReza) February 28, 2026
رضا پہلوی نے خامنہ ای کو ‘مجرم’ قرار دیتے ہوئے کہا کہ ان کی موت اگرچہ بہائے گئے خون کا بدلہ نہیں، تاہم یہ ان خاندانوں کے زخموں پر مرہم کا کام کرسکتی ہے جنہوں نے ایران کے انقلاب میں اپنے پیاروں کو کھویا۔
یہ بھی پڑھیے: ایران کی امریکا اور اسرائیل کے خلاف جوابی کارروائی، ’آپریشن وعدہ صادق 4‘ کا اعلان
اپنے پیغام کے اختتام پر انہوں نے ایرانی عوام سے چوکس اور تیار رہنے کی اپیل کرتے ہوئے کہا کہ ‘سڑکوں پر بھرپور اور فیصلہ کن موجودگی کا وقت قریب ہے’ اور اس عزم کا اظہار کیا کہ ‘مل کر ایران کی آزادی کا جشن منایا جائے گا’۔
واضح رہے کہ رضا پہلوی طویل عرصے سے ایران میں نظامِ حکومت کی تبدیلی کے حامی اور اپوزیشن کی نمایاں آواز سمجھے جاتے ہیں۔
