مشرقِ وسطیٰ میں جاری کشیدگی اور متعدد ممالک کی فضائی حدود بند ہونے کے باعث ویسٹ انڈیز اور زمبابوے کی کرکٹ ٹیمیں ٹی ٹوئنٹی ورلڈ کپ سے اخراج کے بعد بھارت سے وطن واپس نہ جا سکیں۔
ویسٹ انڈیز کو اتوار کے روز میزبان بھارت کے خلاف 5 وکٹوں سے شکست کے بعد سیمی فائنل تک رسائی نہ مل سکی، جبکہ زمبابوے کی ٹیم سپر ایٹس مرحلے میں اپنے تینوں میچز ہار کر ٹورنامنٹ سے باہر ہوگئی۔
یہ بھی پڑھیے: ایران اسرائیل جنگ: خلیجی ممالک کی فضائی حدود بند، پروازیں معطل، مسافروں کو ہدایات جاری
ایران، امریکا اور اسرائیل کے درمیان بڑھتی ہوئی کشیدگی کے نتیجے میں خلیجی ممالک میں ہزاروں پروازیں منسوخ کردی گئیں، جس سے دنیا کے مصروف ترین ٹرانزٹ مراکز بھی متاثر ہوئے اور دونوں ٹیموں کی واپسی مؤخر ہوگئی۔
زمبابوے کرکٹ نے سوشل میڈیا بیان میں کہا کہ مردوں کی ٹیم بھارت میں محفوظ ہے اور اسے دبئی کے راستے وطن واپس آنا تھا، تاہم موجودہ صورتحال کے باعث سفر ممکن نہیں ہوسکا۔
کرکٹ ویسٹ انڈیز نے کہا ہے کہ وہ کھلاڑیوں اور آفیشلز کی محفوظ واپسی کے لیے کھیل کی عالمی تنظیم انٹرنیشنل کرکٹ کونسل کے ساتھ رابطے میں ہے تاکہ متبادل سفری انتظامات کیے جا سکیں۔
یہ بھی پڑھیے: مشرقی وسطیٰ میں کشیدگی کے بعد 8 ممالک کی فضائی حدود بند
دبئی میں قائم آئی سی سی نے بھی قبل ازیں کہا تھا کہ اس نے اپنے عملے کے لیے ہنگامی منصوبہ فعال کردیا ہے، جنہیں دبئی کے راستے اپنے اپنے ممالک روانہ ہونا تھا۔
کرکٹ ویسٹ انڈیز نے مزید کہا کہ کھلاڑیوں، کوچز اور آفیشلز کی سلامتی اور فلاح ان کی اولین ترجیح ہے۔
