تاریخی مندی کے ایک روز بعد پاکستان اسٹاک ایکسچینج میں خریداری کا رجحان لوٹ آیا اور منگل کو بینچ مارک کے ایس ای 100 انڈیکس میں 5,100 سے زائد پوائنٹس کا نمایاں اضافہ ریکارڈ کیا گیا۔
کاروبار کے آغاز پر مارکیٹ میں شدید اتار چڑھاؤ دیکھا گیا اور انڈیکس ابتدائی طور پر تیزی سے گر کر دن کی کم ترین سطح 151,258.85 پوائنٹس تک آگیا، تاہم بعد ازاں جارحانہ خریداری کے باعث صورتحال سنبھل گئی۔
یہ بھی پڑھیں: سرمایہ کاروں کا اعتماد اسٹاک ایکسچینج میں بہتری کا باعث، کیا معیشت مستحکم ہورہی ہے؟
کاروبار کے وسط میں مارکیٹ 153,000 سے 154,500 پوائنٹس کی حد میں محدود رہی جبکہ سرمایہ کاروں نے منافع کو مستحکم کیا۔
سیشن کے آخری لمحات میں خریداری کے دباؤ میں مزید اضافہ ہوا جس کے باعث انڈیکس 156,000 پوائنٹس کی سطح عبور کرتے ہوئے 158,217.01 پوائنٹس کی انٹرا ڈے بلند ترین سطح تک پہنچ گیا، جواختتام پر قدرے نیچے آگیا۔
After a dramatic selloff, the Pakistan Stock Exchange rebounded with the KSE-100 Index soaring over 5,100 points, signaling renewed investor confidence amid value buying, though volatility may continue. https://t.co/7B6t4s8Rhk pic.twitter.com/IS8nksFTGv
— Investify Pakistan (@investifypk) March 3, 2026
کاروبار کے اختتام پر کے ایس ای 100 انڈیکس 5,159.10 پوائنٹس یعنی 3.39 فیصد اضافے کے ساتھ 157,132.09 پوائنٹس پر بند ہوا۔
پیر کے روز پاکستان اسٹاک ایکسچینج کی تاریخ کے ڈرامائی ترین سیشنز میں سے ایک دیکھا گیا تھا، جب بڑھتی ہوئی جغرافیائی سیاسی کشیدگی اور عالمی سطح پر خطرات سے گریز کے رجحان کے باعث شدید فروخت کا دباؤ سامنے آیا۔
مزید پڑھیں: اسٹاک ایکسچینج میں 100 انڈیکس 183,000 پوائنٹس کی سطح عبور کر گیا
اس دوران مارکیٹ ویلیو میں اربوں روپے کی کمی ہوئی اور سرمایہ کاروں کا اعتماد متزلزل ہوگیا۔
اختتامی گھنٹی تک کے ایس ای 100 انڈیکس 16,089.17 پوائنٹس یعنی 9.57 فیصد کی تاریخی کمی کے ساتھ 151,973.00 پوائنٹس پر بند ہوا، جو ایک روز میں پوائنٹس کے اعتبار سے ریکارڈ کمی تھی۔
کاروباری حجم
آل شیئر انڈیکس میں شیئرز کا حجم کم ہو کر 770.69 ملین شیئرز رہا جو گزشتہ سیشن میں 809.55 ملین تھا، شیئرز کی مجموعی مالیت بھی کم ہو کر 44.36 ارب روپے رہی جو پہلے 48.51 ارب روپے تھی۔
حجم کے اعتبار سے کے الیکٹرک لمیٹڈ 74.40 ملین شیئرز کے ساتھ سرفہرست رہی، اس کے بعد ورلڈ کال ٹیلی کام 50.04 ملین شیئرز اور پاک الیکٹرون 38.23 ملین شیئرز کے ساتھ قابل ذکر رہے۔
منگل کو مجموعی طور پر 480 کمپنیوں کے شیئرز کا کاروبار ہوا، جن میں سے 213 کے شیئرز کی قیمت میں اضافہ، 228 میں کمی جبکہ 39 میں کوئی تبدیلی نہیں ہوئی۔
عالمی مارکیٹ کی صورتحال
عالمی سطح پر بھی منگل کو ایشیائی تجارت کے آغاز میں شیئر مارکیٹ میں مندی کا رجحان برقرار رہا جبکہ امریکی ڈالر مضبوط ہوا۔
سرمایہ کار امریکا اور اسرائیل کی ایران پر کارروائیوں کے توانائی کی قیمتوں اور عالمی معیشت پر ممکنہ اثرات کا جائزہ لیتے رہے۔
ایم ایس سی آئی کا جاپان کے علاوہ ایشیا پیسیفک شیئر کا وسیع انڈیکس ایک فیصد گر گیا، جبکہ کوریائی مارکیٹ میں 2.5 فیصد کمی دیکھی گئی۔
مزید پڑھیں: اسٹاک ایکسچینج میں 1100 پوائنٹس کی کمی، سرمایہ کاروں پر دباؤ برقرار
ٹوکیو کا نکی 225 انڈیکس 0.8 فیصد نیچے رہا جبکہ ایس اینڈ پی 500 ای-منی فیوچرز 0.2 فیصد کم ہوئے۔
وال اسٹریٹ میں پیر کو شدید اتار چڑھاؤ کے بعد استحکام دیکھا گیا، ایس اینڈ پی 500 ابتدائی گراوٹ کے بعد بغیر کسی نمایاں تبدیلی کے بند ہوا جبکہ نیسڈیک کمپوزٹ 0.4 فیصد اضافے کے ساتھ بند ہوا۔
ایران کے پاسدارانِ انقلاب کے ایک عہدیدار نے گزشتہ روز اعلان کیا کہ آبنائے ہرمز بحری ٹریفک کے لیے بند کر دی گئی ہے اور کسی بھی جہاز کو گزرنے کی اجازت نہیں دی جائے گی۔
