پاکستان کرکٹ بورڈ (پی سی بی) نے قومی کھلاڑیوں کے کردار پر مبنی ’ایجنڈا پر مبنی جعلی خبریں‘ نشر کرنے پر عوامی معافی کا مطالبہ کیا ہے۔ بورڈ نے خبردار کیا ہے کہ ایسے الزامات ناقابل قبول ہیں اور ذمہ دار صحافی فوری طور پر معافی دے، بصورت دیگر پی سی بی قانونی کارروائی کرے گا۔
یہ بھی پڑھیں:پی سی بی کا کھلاڑیوں پر جرمانہ، عثمان خواجہ کی تنقید
پی سی بی کے بیان میں کہا گیا ہے کہ کھلاڑیوں کے کردار کو ہدف بنانے والی خبریں ناقابل برداشت ہیں اور کسی بھی صورت قبول نہیں کی جائیں گی۔ بورڈ نے زور دیا کہ مذکورہ صحافی فوری طور پر عوامی معافی دے، ورنہ پی سی بی تمام ضروری اقدامات کرے گا تاکہ اس طرح کے نقصان دہ رویے کو سختی سے روکا جا سکے۔
اس تنازع کی شروعات ایک مقامی نیوز آؤٹ لیٹ کی رپورٹ سے ہوئی، جس میں الزام لگایا گیا کہ ایک پاکستانی کھلاڑی نے نامناسب رویہ اختیار کیا اور ہوٹل کے عملے نے ٹیم انتظامیہ کے سامنے شکایت درج کروائی۔ ابتدائی تحقیقات کے بعد ٹیم انتظامیہ نے کھلاڑی کو ضابطہ اخلاق کی خلاف ورزی پر جرمانہ عائد کیا۔
پی سی بی اور کھلاڑی مرزا نے اس رپورٹ کو فوری طور پر مسترد کیا اور قانونی کارروائی کا اعلان کیا۔ مرزا نے فیس بک پر لکھا کہ یہ غیر مصدقہ خبریں گردش کر رہی ہیں اور میں اس سستی صحافت کی سخت مذمت کرتا ہوں۔ کوئی بھی میڈیا ہاؤس بغیر تصدیق کے خبریں نشر نہیں کر سکتا۔ پی سی بی نے پہلے ہی اس جعلی خبر کی تردید کی ہے اور میں قانونی کارروائی کرنے جا رہا ہوں۔
