برطانیہ کے دارالحکومت لندن میں ایران کے لیے مبینہ جاسوسی کے شبے میں 4 افراد کو گرفتار کر لیا گیا۔ پولیس کے مطابق یہ افراد یہودی برادری سے منسلک مقامات اور شخصیات کے بارے میں معلومات جمع کرنے کے شبے میں زیرِ حراست لیے گئے ہیں۔
میٹروپولیٹن پولیس کے مطابق جمعے کے روز ایک ایرانی شہری اور برطانوی و ایرانی شہریت رکھنے والے 3 افراد کو بارنیٹ اور واٹفورڈ سے حراست میں لیا گیا۔ ان پر غیر ملکی خفیہ ایجنسی کی مدد کرنے کا شبہ ہے۔
یہ بھی پڑھیں: ایران کا اسرائیلی جاسوسوں کے خلاف کریک ڈاؤن، 700 سے زائد گرفتاریاں
کاؤنٹر ٹیررازم پولیسنگ لندن کی سربراہ ہیلن فلینگر کے مطابق یہ گرفتاریاں ایک طویل عرصے سے جاری تحقیقات کا حصہ ہیں اور حکام مشتبہ سرگرمیوں کو روکنے کے لیے کارروائیاں جاری رکھے ہوئے ہیں۔
گرفتار ہونے والوں میں 40 اور 55 سال کے دو افراد بارنیٹ سے، 52 سالہ شخص واٹفورڈ سے جبکہ 22 سالہ نوجوان کو ہیرو سے گرفتار کیا گیا۔
پولیس کا کہنا ہے کہ بارنیٹ، ویمبلے اور دیگر مقامات پر تلاشی کا عمل جاری ہے۔
یہ بھی پڑھیں: جاسوسی کا الزام:سابق ایرانی ڈپٹی وزیر دفاع کو موت کی سزا سنا دی گئی
مزید کارروائی میں 6 دیگر افراد کو بھی ہیرو سے گرفتار کیا گیا جن کی عمریں 20 سے 49 سال کے درمیان ہیں۔ ان پر ایک ملزم کی معاونت کا شبہ ہے، جبکہ ان میں سے ایک شخص کو پولیس اہلکار پر حملہ کرنے کے الزام میں بھی گرفتار کیا گیا۔
پولیس کے مطابق مجموعی طور پر تمام 10 افراد کو حراست میں لے کر مزید تفتیش شروع کر دی گئی ہے۔
