انسانی حقوق کے علمبردار اور سماجی کارکن جبران ناصر ایڈووکیٹ کو کراچی علاقے ڈیفینس کی شاہراہ سے نامعلوم مسلح افراد نے مبینہ طور پر اغوا کرلیا گیا ہے۔
جبران ناصر کی اہلیہ اداکارہ منشا پاشا نے رات گئے ایک ویڈیو پیغام میں بتایا ہے کہ پستول کے ساتھ سادہ کپڑوں میں ملبوس قریباً 15 افراد نے ان کی گاڑی کو گھیر لیا اور جبران کو اسلحہ کے زور پر اپنے ساتھ لے گئے۔ ’وہ صرف ہم پر گاڑی سے باہر نکلنے کے لیے چیختے رہے اور کوئی وضاحت پیش نہیں کی۔‘
منشا پاشا نے مزید بتایا ہے کہ سفید رنگ کی ٹویوٹا ہائی لکس ویگو نے، جس کا نمبر بی ایف 4356 تھا، سامنے اور بائیں جانب سے ہماری گاڑی کو ٹکر ماری اور ہمیں کراچی کے ڈیفنس فیز 5 میں 26 ویں اسٹریٹ پر آئیڈیل بیکری کے قریب رکنے پر مجبور کیا۔
’سادہ کپڑوں میں مسلح افراد گاڑیوں سے باہر آئے اور میرے شوہر کو زبردستی گاڑی سے باہر نکلنے پر مجبور کیا، اس کے بعد وہ انہیں اغوا کرکے لے گئے اور اب تک اس کا پتا نہیں چل سکا ہے۔‘
کچھ دیر پہلے میرے شوہر جبران ناصر کو ویگو ڈالا میں آئے نامعلوم افراد اٹھا لے گئے۔۔۔۔منشا پاشا@manshapasha pic.twitter.com/kb8vYPCxOv
— Kashif Baloch (@Skiper786) June 1, 2023
منشا پاشانے ناصر جبران کی فوری رہائی اور ملزمان کے خلاف کارروائی کا مطالبہ کرتے ہوئے عوام سے درخواست کی کہ ان کے شوہر کی جلد گھر واپسی کے لیے دعا کریں۔
خیال رہے جبران ناصر وکیل اور سماجی کاموں اور انسانی حقوق کے لیے آواز اٹھانے کے لیے معروف ہیں۔ انہوں نے 2013 اور 2018 کے عام انتخابات میں آزاد امیدوار کی حیثیت سے حصہ لیا تھا۔ انہیں 2013 میں فارن پالیسی میگزین نے فرقہ وارانہ تشدد کے خلاف متاثر کن کام کرنے والے 3 پاکستانیوں کی فہرست میں بھی شامل کیا تھا۔
HRCP is deeply concerned by reports that lawyer and activist @MJibranNasir has been abducted by unknown armed persons in Karachi. We demand that he be safely recovered immediately and his abductors held accountable under the law.
— Human Rights Commission of Pakistan (@HRCP87) June 1, 2023
اُدھر انسانی حقوق کمیشن پاکستان نے جبران ناصر کے اغوا پر شدید اظہار تشویش کرتے ہوئے مطالبہ کیا کہ جبران کو بحفاظت فوری طورپر بازیاب کرایا جائے اور اغواکاروں کو قانون کے مطابق انصاف کے کٹہرے میں لایا جائے۔ سوشل میڈیا پر صارفین کی بڑی تعداد نے ناصر جبران کے مبینہ اغوا کی پر زور مذمت کی ہے۔
No words… complete madness#ReleaseJibranNasir https://t.co/QDvUnKIk6w
— Imaan Zainab Mazari-Hazir (@ImaanZHazir) June 1, 2023
سندھ ہائی کورٹ بار ایسوسی ایشن نے بھی انسانی حقوق کے کارکن جبران ناصر ایڈووکیٹ کے مبینہ اغوا کی شدید مذمت کرتے ہوئے کہا ہے کہ جبران ناصر کو انکی اہلیہ کی موجودگی میں مسلح افراد کی جانب سے اغوا کا عمل قانون کی بالادستی کی راہ میں رکاوٹ سمجھا جارہا ہے۔
سندھ ہائی کورٹ بار ایسوسی ایشن نے اپنے ایک اعلامیہ میں اس واقعہ کی تحقیقات کا مطالبہ کرتے ہوئے کہا ہے کہ قانون نافذ کرنے والے ادارے شہریوں بشمول وکلا کی جان و مال کے تحفظ کو یقینی بنائیں۔
’اس واقعہ میں ملوث ملزمان کو گرفتار کرکے جبران ناصر کو بحفاظت بازیاب کروایا جائے۔ سندھ ہائی کورٹ بار پولیس اور قانون نافذ کرنے والے اداروں سے تحقیقات کا مطالبہ کرتی ہے۔‘
