ون ڈے سیریز کے پہلے میچ میں بنگلہ دیش نے پاکستان کو 8 وکٹوں سے شکست دے دی ہے۔
ڈھاکا کے شیربنگلہ نیشنل اسٹیڈیم میں کھیلے گئے بنگلہ دیش کیخلاف پہلے ون ڈے میچ میں پاکستان کی بیٹنگ لائن بری طرح ناکام رہی اور پوری ٹیم 114 رنز بنا کر آؤٹ ہوگئی۔
بنگلہ دیش نے ٹاس جیت کر پاکستان کو بیٹنگ کی دعوت دی، تاہم پاکستانی اوپنرز سمیت ٹاپ بیٹنگ آرڈر بنگلہ دیشی بولرز کے سامنے بے بس نظر آئے۔
مزید پڑھیں: بنگلہ دیش کے خلاف ون ڈے سیریز: 15 رکنی اسکواڈ میں شامل 6 نئے کھلاڑی کون؟
پاکستانی بلے باز غیر محتاط اسٹروک کھیلتے ہوئے یکے بعد دیگرے وکٹیں گنواتے رہے۔
فہیم اشرف 37 رنز بنا کر ٹاپ اسکورر رہے جبکہ صاحبزادہ فرحان 27، محمد رضوان 10 اور معاذ صداقت 18 رنز کے ساتھ نمایاں بلے باز رہے۔
Pakistan’s playing XI for the first ODI 🇵🇰
4️⃣ debutants in the side 🏏#BANvPAK | #BackTheBoysInGreen pic.twitter.com/06d8buxam7
— Pakistan Cricket (@TheRealPCB) March 11, 2026
شامل حسین 4، سلمان علی آغا 5 اور حسین طلعت 4 رنز بنا کر آؤٹ ہوئے، جبکہ وسیم جونیئر اور عبدالصمد کوئی رنز نہیں بناسکے۔
بنگلہ دیش کی جانب سے نہید رانا نے تباہ کن بولنگ کا مظاہرہ کرتے ہوئے 5 کھلاڑیوں کو آؤٹ کیا، جبکہ مہدی حسن میراز نے 3 وکٹیں حاصل کیں۔
115 رنز کے ہدف کے تعاقب میں بنگلہ دیش نے جارحانہ آغاز کیا۔ تنزید حسن نے شاندار بیٹنگ کرتے ہوئے ناقابل شکست 67 رنز بنائے، جن میں 7 چوکے اور 5 چھکے شامل تھے۔ نجم الحسن شانتو نے 27 رنز کی اہم اننگز کھیلی، جبکہ لٹن داس 3 رنز کے ساتھ ناٹ آؤٹ رہے۔
پاکستان کی جانب سے شاہین شاہ آفریدی اور محمد وسیم ایک، ایک وکٹ حاصل کرسکے، تاہم بنگلہ دیشی بیٹرز نے پاکستانی بولرز کو زیادہ مواقع نہیں دیے اور ہدف آسانی سے مکمل کرلیا۔
یاد رہے کہ پاکستان کی جانب سے میچ میں 4 نئے کھلاڑیوں عبدالصمد، معاذ صداقت، صاحبزادہ فرحان اور شامل حسین نے اپنا انٹرنیشنل ون ڈے کرکٹ میں ڈیبیو کیا۔
