پاکستان سپر لیگ (پی ایس ایل) کے گیارہویں ایڈیشن کی ٹرافی کی باضابطہ رونمائی کردی گئی۔
ٹرافی کی تقریبِ رونمائی کراچی کے نیشنل اسٹیڈیم میں منعقد ہوئی جہاں لیگ کے منتظمین اور دیگر متعلقہ شخصیات نے شرکت کی۔
Made for legends. Polished for glory. The magnificent HBL PSL 11 Trophy! 🏆#HBLPSL | #NewEra pic.twitter.com/khldFnOqrM
— PakistanSuperLeague (@thePSLt20) March 11, 2026
تقریب سے خطاب کرتے ہوئے پی ایس ایل کے چیف ایگزیکٹو آفیسر سلمان نصیر نے کہاکہ لیگ کی کامیابی میں فرنچائز مالکان کا کردار نہایت اہم رہا ہے۔
ان کا کہنا تھا کہ پی ایس ایل ایک خاندان کی طرح ہے اور تمام ٹیمیں ایک ہی ٹرافی کے حصول کے لیے مقابلہ کریں گی۔
پی ایس ایل کی نئی ٹرافی کو ’انفینٹی‘ کا نام دیا گیا ہے، جسے ایک مقامی جیولری کمپنی نے ڈیزائن کیا ہے۔
حنیف جیولرز کی جانب سے تیار کردہ اس ٹرافی کو 18 ماہر کاریگروں نے ہاتھ سے تیار کیا، ٹرافی کا ڈیزائن گزشتہ ایک دہائی کے دوران ایچ بی ایل پاکستان سپر لیگ کے سفر اور ترقی کی عکاسی کرتا ہے۔
ٹرافی کے نچلے حصے میں 8 زمرد نما قیمتی پتھر لگائے گئے ہیں جو پی ایس ایل کی 8 فرنچائزز کے رنگوں کی نمائندگی کرتے ہیں اور ان شہروں کے وقار کی علامت ہیں جن کی وہ نمائندگی کرتی ہیں۔ ٹرافی کی بلند ساخت مقابلے کی چوٹی تک پہنچنے کے لیے درکار نظم و ضبط، عزم اور ٹیم ورک کو ظاہر کرتی ہے، جبکہ اس کے اوپر بنا ہلال اور ستارہ اتحاد، امید اور قومی فخر کی علامت ہے۔
اس سے قبل پی ایس ایل 11 کا آفیشل لوگو بھی جاری کیا جا چکا ہے، جس میں اردو میں ’گیارہ‘ کے ساتھ ساتھ ہندسہ 11 بھی نمایاں طور پر دکھایا گیا ہے۔
یاد رہے کہ پاکستان کرکٹ بورڈ نے ایچ بی ایل پی ایس ایل 11 کے شیڈول کا اعلان کردیا ہے، جس کے مطابق یہ ٹورنامنٹ 26 مارچ سے 3 مئی تک جاری رہے گا اور اس دوران 44 میچز کھیلے جائیں گے۔
مزید پڑھیں: پی ایس ایل 11 کا آفیشل لوگو جاری، منفرد کیا ہے؟
پی ایس ایل کے اس ایڈیشن میں 2 نئی ٹیموں کے شامل ہونے کے بعد کل 8 ٹیمیں مقابلہ کریں گی۔ نئی فرنچائزز میں حیدرآباد کنگز اور راولپنڈی لیگ شامل ہیں۔
میچز ملک کے 6 شہروں میں کھیلے جائیں گے، جن میں فیصل آباد اور پشاور پہلی بار میزبان ہوں گے، جبکہ افتتاحی میچ قذافی اسٹیڈیم لاہور میں منعقد ہوگا۔ ہر ٹیم لیگ مرحلے میں 10 میچز کھیلے گی اور پلے آف کا آغاز 28 اپریل سے ہوگا۔
