پاکستان اور آذربائیجان دوطرفہ سیاسی مشاورت کا تیسرا دور آذربائیجانی دارالحکومت باکو میں مکمل کرلیا گیا ہے، جس میں دونوں فریقین نے کثیر جہتی اور تاریخی دوطرفہ تعلقات کا جائزہ لینے کے لیے نہ صرف وسیع پیمانے پر بات چیت کی بلکہ برادرانہ تعلقات کو مزید وسعت دینے پر اتفاق کیا۔
دفتر خارجہ کے اعلامیہ کے مطابق پاکستان وفد کی قیادت سیکرٹری خارجہ ڈاکٹر اسد مجید خان جب کہ نائب وزیر خارجہ النور ممدوف نے آذربائیجان کے وفد کی قیادت کی۔ ملاقات میں باکو میں تعینات پاکستانی سفیر بلال حئی نے بھی شرکت کی۔
دونوں ممالک کے مابین دوطرفہ تجارت کو متنوع بنانے اور توانائی، انفارمیشن ٹیکنالوجی، مزدوروں کی نقل و حرکت، زراعت، ٹرانسپورٹ روابط اور تعلیم کے شعبوں میں تعاون بڑھانے پر اتفاق کیا گیا ہے۔
دونوں فریقین نے اقوام متحدہ اور اسلامی تعاون تنظیم سمیت عالمی فورمز پر باہمی تعاون پر اطمینان کا اظہار کیا۔ سیکریٹری خارجہ نے اپنے آذربائیجانی ہم منصب کو بھارتی تسلط کے زیر اثر مقبوضہ جموں و کشمیر کی سنگین صورتحال سے آگاہ کیا۔
مقبوضہ کشمیر پر پاکستانی موقف سے ہم آہنگ موقف اختیار کرنے پر آذربائیجان کا شکریہ ادا کرتے ہوئے سیکریٹری خارجہ اسد مجید نے آذربائیجان کی علاقائی سالمیت اور خودمختاری پر پاکستان کے موقف کا اعادہ کیا۔
پاکستان اور آذربائیجان کے درمیان اقتصادی تعاون کے بڑھتے ہوئے مواقع کے پیش نظر، سیکریٹری خارجہ اسد مجید نے آذربائیجان کے ممتاز تاجروں اور کمپنی کے سینیئر نمائندوں کے ایک منتخب گروپ کے ساتھ تجارت اور سرمایہ کاری کے مواقع پر ایک خصوصی اجلاس میں تبادلہ خیال بھی کیا۔
سیکریٹری خارجہ اسد مجید نے آذربائیجان ڈپلومیٹک اکیڈمی یونیورسٹی میں منعقدہ ایک گول میز کانفرنس میں تھنک ٹینک سے وابستہ ماہرین اور تعلیمی ماہرین کے ساتھ بھی بات چیت میں حصہ لیا۔
