وفاقی تحقیقاتی ادارے ایف آئی اے نے بینظیر انکم سپورٹ پروگرام کے کراچی میں ملیر اور کورنگی کے دفتر پر کارروائی کرتے ہوئے متعدد اہم ریکارڈ قبضے میں لیا۔
ایف آئی اے کے ترجمان کے مطابق یہ کارروائی پروگرام میں مبینہ کرپشن کی تحقیقات کے سلسلے میں کی گئی۔
ترجمان نے بتایا کہ برآمد شدہ اشیا میں موبائل فونز، لیپ ٹاپ اور دستاویزات شامل ہیں جبکہ غیر قانونی کٹوتیوں سے متعلق چھپائی گئی شکایات بھی ریکارڈ میں ملیں۔
ایف آئی اے کے ترجمان نے مزید کہاکہ کچھ مستحقین کے وفات کے سرٹیفکیٹس بھی تحویل میں لیے گئے، اور ابتدائی شواہد سے ظاہر ہوتا ہے کہ ایک منظم گروہ مستحقین کے حق کا استحصال کر رہا تھا۔
واضح رہے کہ اس سے قبل بھی بی آئی ایس پی میں سنگین بے ضابطگیاں سامنے آتی رہی ہیں، جہاں سرکاری ملازمین مستحقین کا فنڈز حاصل کرتے رہے۔
