چین نے اپنے دوسرے مقامی طور پر تیار کیے گئے بڑے کروز جہاز کو ایک اہم مرحلہ عبور کرتے ہوئے شنگھائی میں ڈرائی ڈاک سے باہر نکال دیا ہے، جو اس کی حتمی تیاری اور آزمائشی سفر کے قریب ہونے کی علامت ہے۔
یہ بھی پڑھیں:کروز شپ کمپنی نے لیگو بوٹس بنانے کا عالمی ریکارڈ قائم کرلیا
چینی میڈیا کے مطابق ’اڈورا فلورا سٹی‘ نامی اس بڑے جہاز کو طاقتور ٹگ بوٹس کی مدد سے آہستہ آہستہ تعمیراتی جگہ سے نکال کر اگلے مرحلے میں منتقل کیا گیا، جہاں اب اس کی اندرونی تنصیب اور سسٹمز کی مکمل جانچ کی جائے گی۔ یہ کام چائنا اسٹیٹ شپ بلڈنگ کارپوریشن کے ذیلی ادارے کے تحت کیا جا رہا ہے۔
حکام کے مطابق جہاز کو رواں سال کے آخر تک مکمل کر کے سروس کے لیے تیار کیا جائے گا، جس کے بعد یہ بین الاقوامی سمندری سفر کے لیے استعمال ہوگا۔ اس منصوبے کو چین کی کروز ٹورازم صنعت کو فروغ دینے کی ایک اہم پیش رفت قرار دیا جا رہا ہے۔
