وفاقی وزیر اطلاعات عطااللہ تارڑ نے کہا ہے کہ حکومت نے رواں ہفتے پیٹرول اور ڈیزل کی قیمتوں میں ممکنہ بڑے اضافے کو روک دیا تاکہ عیدالفطر کے موقع پر عوام کو ریلیف فراہم کیا جا سکے۔
یہ بھی پڑھیں: عید کے موقع پر وزیراعظم شہباز شریف کا پیٹرول و ڈیزل کی قیمتیں برقرار رکھنے کا اعلان
لاہور میں وزیر توانائی علی پرویز ملک کے ہمراہ مشترکہ پریس کانفرنس کرتے ہوئے انہوں نے بتایا کہ عالمی منڈی کے تناظر میں پیٹرول کی قیمت میں تقریباً 150 روپے اور ڈیزل کی قیمت میں 250 روپے تک اضافے کا امکان تھا جسے حکومتی اقدامات کے ذریعے مؤخر کر دیا گیا۔
عالمی منڈی میں تیل مزید مہنگا ہونے کا خدشہ
عطا تارڑ کا کہنا تھا کہ آنے والے دنوں میں عالمی سطح پر تیل کی قیمتوں میں مزید اضافہ ہو سکتا ہے اس لیے ضروری ہے کہ ملک میں توانائی کے استعمال سے متعلق مؤثر حکمت عملی اختیار کی جائے۔
مزید پڑھیے: پیٹرولیم مصنوعات کی قیمتوں میں پھر ایک بڑا اضافہ متوقع، سمری ارسال
انہوں نے اس بات پر زور دیا کہ حکومت اور عوام دونوں کو مل کر بچت کے اقدامات کرنا ہوں گے۔
کفایت شعاری پالیسی کے تحت فیصلہ
وزیر پیٹرولیم علی پرویز ملک نے اس موقعے پر کہا کہ خطے میں موجودہ کشیدگی کے باعث حالات غیر یقینی ہیں تاہم وزیراعظم کی ہدایت پر حکومتی ٹیم نے کفایت شعاری کو مدنظر رکھتے ہوئے عوام کو ریلیف دینے کا فیصلہ کیا۔
انہوں نے بتایا کہ حکومتی اخراجات میں کمی اور مراعات میں کٹوتی جیسے اقدامات کے ذریعے اس ہفتے پیٹرولیم مصنوعات کی قیمتوں میں اضافے کو روکا گیا۔
توانائی بچت کے لیے مشترکہ اقدامات کی ضرورت
علی پرویز ملک نے کہا کہ توانائی کے بحران سے نمٹنے کے لیے حکومت اور عوام دونوں کو ذمہ داری کا مظاہرہ کرنا ہوگا۔
مزید پڑھیں: حکومت کا ملک میں پیٹرولیم مصنوعات کی موجودہ سطح پر اطمینان کا اظہار
ان کے مطابق صوبائی حکومتوں کے ساتھ مل کر ایک مؤثر اور پائیدار نظام تشکیل دیا جائے گا تاکہ توانائی کی بچت کو یقینی بنایا جا سکے۔
کمزور طبقے کے تحفظ کا عزم
انہوں نے مزید کہا کہ حکومت معاشرے کے کمزور طبقات کو سہارا دینے کے لیے پرعزم ہے اور تمام فریقین کو مل کر موجودہ چیلنجز سے نکلنے کے لیے کردار ادا کرنا ہوگا۔
