کراچی میں واقع گل پلازا کی ایک دکان میں ایک بار پھر آگ لگنے کا واقعہ پیش آیا ہے، جس کے بعد عمارت کے اندر سے نشے کے عادی مشتبہ شخص کو حراست میں لے لیا گیا، جبکہ فائر بریگیڈ نے آگ بجھانے کے لیے کارروائی شروع کر دی ہے۔
یہ بھی پڑھیں:سانحہ گل پلازہ: 73 افراد کی ہلاکت کی بنیادی وجہ دم گھٹنا قرار
کراچی کے علاقے میں واقع گل پلازا میں آتشزدگی کی اطلاع ملتے ہی فائر بریگیڈ کی 5 گاڑیاں موقع پر پہنچ گئیں اور آگ بجھانے کا عمل شروع کر دیا گیا۔ حکام کے مطابق عمارت کے بیسمنٹ میں واقع ایک دکان میں آگ لگی، جس کے بعد وہاں سے دھواں اٹھتا دیکھا گیا۔
میڈیا رپورٹ کے مطابق پولیس حکام نے بتایا کہ گل پلازا کے بیسمنٹ (گیٹ نمبر ایک کے قریب) واقع دکان میں آگ لگی، جبکہ ایڈیشنل ڈپٹی کمشنر جنوبی عاصمہ بتول کے مطابق عمارت پہلے ہی سیل تھی اور اس وقت یہ واضح نہیں کہ آگ کتنی دکانوں تک پھیلی ہے۔ ان کے مطابق ریسکیو ٹیمیں اندر داخل ہونے کی کوشش کر رہی ہیں۔
یہ بھی پڑھیں:گل پلازہ آتشزدگی کیس: ڈپٹی کمشنر جنوبی کا جوڈیشل کمیشن میں تفصیلی جواب جمع
پولیس کا کہنا ہے کہ عمارت کے اندر سے ایک نشے کے عادی شخص کو حراست میں لیا گیا ہے، جس پر ابتدائی طور پر شبہ ظاہر کیا جا رہا ہے کہ وہ چوری کی نیت سے عمارت میں داخل ہوا تھا اور ممکنہ طور پر آگ لگنے کا باعث بھی وہی شخص ہو سکتا ہے۔
دوسری جانب واٹر کارپوریشن حکام نے فائر بریگیڈ اور ریسکیو کی درخواست پر فوری مدد فراہم کرتے ہوئے نیپا اور صفورہ ہائیڈرنٹس پر ایمرجنسی نافذ کر دی ہے۔ حکام کے مطابق متعدد واٹر ٹینکرز جائے وقوعہ پر روانہ کیے گئے ہیں جبکہ سخی حسن ہائیڈرنٹ پر ٹینکرز کو اسٹینڈ بائی پر رکھا گیا ہے۔
واضح رہے کہ 17 جنوری 2026 کو بھی کراچی کے ایم اے جناح روڈ پر واقع اسی گل پلازا میں شدید آتشزدگی کا واقعہ پیش آیا تھا، جس میں آگ تین روز تک بھڑکتی رہی اور اس سانحے میں 70 سے زائد افراد جاں بحق ہو گئے تھے۔
