صدرِ مملکت آصف علی زرداری نے کہا ہے کہ یومِ پاکستان ہمیں یاد دلاتا ہے کہ قومی عزم کو حقیقت میں بدلنے کے لیے اتحاد اور یکجہتی سب سے اہم عناصر ہیں۔
یومِ پاکستان کے موقع پر پوری قوم کو دلی مبارکباد پیش کرتے ہوئے اپنے پیغام میں صدر نے کہا کہ اسی دن 1940 میں برصغیر کے مسلمانوں نے قراردادِ پاکستان منظور کی اور ایک ایسے علیحدہ وطن کا تصور پیش کیا جہاں وہ اسلامی اصولوں کے مطابق آزادانہ زندگی گزار سکیں۔
صدر نے کہا کہ آج ہم اپنے ان بزرگوں کو خراجِ عقیدت پیش کرتے ہیں جن کی جدوجہد اور قربانیوں کے نتیجے میں پاکستان کا قیام عمل میں آیا۔
یہ بھی پڑھیں: یومِ پاکستان: مسلح افواج کی قوم کو مبارکباد، عزمِ نو کا اعادہ
انہوں نے کہا کہ 1947 میں قیامِ پاکستان کے وقت ہمیں بے شمار چیلنجز کا سامنا تھا، تاہم تاریخ گواہ ہے کہ باہمی تعاون، محنت اور صلاحیت کے ذریعے ہم نے ان مشکلات پر قابو پایا اور ہر میدان میں نمایاں کامیابیاں حاصل کیں۔
ہم نے ریاستی ادارے قائم کیے، دفاع کو ناقابلِ تسخیر بنایا، جوہری صلاحیت حاصل کی، دہشت گردی کے خلاف طویل اور کامیاب جنگ لڑی اور قدرتی آفات کے دوران قربانی اور باہمی تعاون کی روشن مثالیں قائم کیں۔
صدر نے کہا کہ گزشتہ سال مئی میں معرکۂ حق کے دوران ہم نے دشمن کی جارحیت کا بہادری سے مقابلہ کیا اور اسے ایسا سبق سکھایا جو وہ طویل عرصے تک یاد رکھے گا۔
مزید پڑھیں: یوم پاکستان: صدر مملکت نے مسلح افواج کے افسران اور جوانوں کے لیے فوجی اعزازات کا اعلان کردیا
انہوں نے کہا کہ آج بھی ملک کو اندرونی اور بیرونی محاذوں پر چیلنجز درپیش ہیں، تاہم ہم دہشتگردی کے سرپرست عناصر اور بھارت یا اس کے آلۂ کاروں کے ذریعے امن کو نقصان پہنچانے کی کوشش کرنے والوں کا مکمل خاتمہ کریں گے تاکہ ملک اور سرحدوں کو محفوظ بنایا جا سکے۔
صدر نے کہا کہ بھارت کے غیر قانونی زیرِ قبضہ جموں و کشمیر میں بھارتی افواج کی جانب سے انسانی حقوق کی کھلی خلاف ورزیاں، آبادی کا تناسب تبدیل کرنے کی کوششیں، ہندوتوا کی سرپرستی اور بھارت میں اقلیتوں خصوصاً مسلمانوں کے ساتھ ناانصافی اس بات کا ثبوت ہیں کہ قائداعظم اور مسلم قیادت کا علیحدہ وطن کا فیصلہ درست تھا۔ کشمیر برصغیر کی تقسیم کا نامکمل ایجنڈا ہے۔
انہوں نے کہا کہ عالمی برادری بھارت پر زور دے کہ وہ مقبوضہ کشمیر کے عوام کو اپنی مرضی کے مطابق زندگی گزارنے دے اور اقوامِ متحدہ کی سلامتی کونسل کی قراردادوں کے مطابق انہیں حقِ خودارادیت فراہم کرے۔
