9 مئی کو جی ایچ کیو راولپنڈی پر حملہ کرنے والے شر پسندوں کے ایک اور سرغنہ کی شناخت ہو گئی ہے، پی ٹی آئی کے شر پسند سرغنہ کا نام میاں عاطف محمود قریشی ہے۔
قانون نافذ کرنے والوں ادارے کے مطابق میاں عاطف محمود قریشی پاکستان تحریک انصاف (پی ٹی آئی) کا نائب صدر راولپنڈی اور محلہ قریشیاں صیحام راولپنڈی کا رہائشی ہے۔
میاں عاطف محمود قریشی نے جی ایچ کیو حملے پر بھرپور انداز میں حصہ لیا جو ویڈیو کلپس میں بھی دیکھا جا سکتا ہے۔ شر پسند سر غنہ میاں عاطف نے موقع پر پیٹرول بم بنا کر جی ایچ کیو کے مرکزی دروازے کی طرف پھینکے اور ریاست مخالف نعرے بازی اور توڑ پھوڑ میں بھی مرکزی کردار ادا کیا۔
فوجی املاک خصوصاً جی ایچ کیو پر حملہ اور فوج مخالف نعرے بازی پر میاں عاطف محمود قریشی کے خلاف قانونی گھیرا تنگ کر دیا گیا ہے۔ کہا گیا کہ ہے فوجی تنصیبات پر حملہ کرنے والی کی شناخت کا عمل جلد مکمل کر لیا جائے گا اور انہیں قانون کے مطابق قرار واقعی سزا دی جائے گی۔
