محکمہ داخلہ پنجاب کے ترجمان کے مطابق صوبہ بھر میں سکیورٹی خدشات کے پیشِ نظر دفعہ 144 کے تحت ڈرون اُڑانے پر عائد پابندی میں مزید 30 روز کی توسیع کر دی گئی ہے، جس کا اطلاق 25 اپریل تک ہوگا۔
یہ بھی پڑھیں:پنجاب کے تمام اضلاع میں پہلی بار اینٹی ڈرون یونٹ قائم کرنے کا فیصلہ
لاہور سے جاری بیان میں محکمہ داخلہ پنجاب نے اعلان کیا ہے کہ صوبہ بھر میں کھلی فضا میں آؤٹ ڈور ڈرون اُڑانے پر مکمل پابندی برقرار رہے گی۔ یہ فیصلہ امن و امان کی صورتحال اور عوامی تحفظ کو مدنظر رکھتے ہوئے کیا گیا ہے۔
ترجمان کے مطابق حکومت پنجاب نے دفعہ 144 کے تحت اس پابندی میں مزید 30 روز کی توسیع کر دی ہے تاکہ کسی بھی ممکنہ سکیورٹی خطرے سے نمٹا جا سکے۔
تاہم، ہالز اور مارکیز کے اندر منعقد ہونے والی تقریبات کے دوران چھوٹے ڈرون کے محدود استعمال کی اجازت دی گئی ہے، جس کی مکمل ذمہ داری منتظمین پر عائد ہوگی کہ وہ اس کے محفوظ استعمال کو یقینی بنائیں۔
بیان میں واضح کیا گیا ہے کہ قانون نافذ کرنے والے اور انٹیلیجنس ادارے اس پابندی سے مستثنیٰ ہوں گے۔
یہ بھی پڑھیں: محکمہ داخلہ پنجاب کی سول ڈیفنس کو جدید اینٹی ڈرون گنز فراہم
محکمہ داخلہ پنجاب کے مطابق عوامی تحفظ، امن و امان کا قیام اور املاک کی حفاظت حکومت کی اولین ترجیح ہے، اسی لیے صوبہ بھر میں انتظامیہ اور پولیس کو احکامات پر سختی سے عملدرآمد کی ہدایت جاری کر دی گئی ہے۔
