حیدرآباد کنگز مین کے آل راؤنڈر صائم ایوب نے کہا ہے کہ آؤٹ آف فارم ان کے لیے پریشانی کا سبب نہیں بلکہ ایک نیا چیلنج ہے، اور وہ اس دوران زیادہ سے زیادہ سیکھنے کی کوشش کررہے ہیں۔
نجی ٹی وی سے گفتگو کرتے ہوئے انہوں نے کہاکہ ان کا فوکس صرف نتائج پر نہیں بلکہ کھیل کے عمل سے تجربہ حاصل کرنے پر ہے۔
صائم ایوب نے کہاکہ نئی ٹیم میں شامل ہونے کے بعد ماحول توقع سے بہتر نکلا ہے۔ وہ ٹیم کے دیگر کھلاڑیوں کے ساتھ پہلے بھی کھیل چکے ہیں، جن میں امریکی اور ڈومیسٹک کھلاڑی شامل ہیں۔
انہوں نے بتایا کہ کپتان مارنوس لبوشین خوش مزاج ہیں اور ٹیم میں دوستانہ ماحول ہے، جس کی وجہ سے کھیل کا تجربہ مزید دلچسپ ہو رہا ہے۔
صائم ایوب، جو پی ایس ایل کے مہنگے ترین کھلاڑیوں میں شامل ہیں، نے کہا کہ کسی بھی ٹیم سے توقعات ہمیشہ زیادہ رہتی ہیں۔
انہوں نے مزید کہاکہ ٹیم مینجمنٹ نے بیٹنگ، بولنگ اور فیلڈنگ میں جارحانہ انداز اپنانے پر زور دیا ہے تاکہ کھلاڑی جارحانہ کرکٹ کھیلنے کی عادت ڈال سکیں۔
آؤٹ آف فارم ہونے کے حوالے سے سوال پر صائم ایوب نے کہاکہ یہ میرے لیے ایک چیلنج ہے، کیریئر میں ایسے لمحات آتے رہتے ہیں، اور میں اس دوران چیزیں سیکھنے کی کوشش کررہا ہوں۔ نتائج کی پرواہ کیے بغیر، میں پراسس پر فوکس کرکے اپنے کھیل کو بہتر بنانے کی کوشش کررہا ہوں۔
