امریکی خلائی ادارے ناسا کا آرٹیمس II مشن یکم اپریل کو لانچ کیا جائے گا، جو 1972 کے بعد پہلی بار انسانوں کو چاند کے قریب لے جانے والا تاریخی مشن ہوگا۔
ناسا کے مطابق چار خلا بازوں پر مشتمل یہ مشن فلوریڈا کے کینیڈی اسپیس سینٹر سے اسپیس لانچ سسٹم (SLS) راکٹ کے ذریعے پاکستانی وقت کے مطابق رات تقریباً 3 بج کر 24 منٹ (6:24pm EDT) پر روانہ ہوگا۔
لائیو دیکھنے کا طریقہ
ناسا اس مشن کی لانچ اور اس سے قبل کی تمام سرگرمیوں کو براہ راست نشر کرے گا۔ فیولنگ کا عمل صبح 7:45am EDT جبکہ مکمل کاؤنٹ ڈاؤن 12:50pm EDT سے شروع ہوگا۔ یہ لائیو اسٹریم NASA+، ناسا کی ویب سائٹ، یوٹیوب، نیٹ فلکس اور ایمیزون پرائم پر دستیاب ہوگی۔
آرٹیمس II مشن میں اوریون خلائی جہاز چاند کے گرد ’فری ریٹرن ٹریجیکٹری‘ پر سفر کرے گا اور زمین پر واپس آئے گا۔ اس دوران خلا باز زندگی برقرار رکھنے کے نظام، نیویگیشن اور کمیونیکیشن سمیت اہم ٹیکنالوجیز کا جائزہ لیں گے، جو مستقبل کے چاند مشنز کے لیے بنیاد فراہم کریں گی۔
خلا بازوں کی ٹیم
مشن ٹیم میں کمانڈر ریڈ وائز مین، پائلٹ وکٹر گلوور، اور مشن اسپیشلسٹ کرسٹینا کوچ اور جیریمی ہینسن شامل ہیں۔ کرسٹینا کوچ چاند کے قریب جانے والی پہلی خاتون، وکٹر گلوور پہلے سیاہ فام اور جیریمی ہینسن پہلے غیر امریکی خلا باز ہوں گے۔
مشن کے اختتام پر خلائی جہاز بحرالکاہل میں لینڈ کرے گا، جبکہ آرٹیمس پروگرام کا مقصد 2028 تک انسانوں کو دوبارہ چاند پر اتارنا ہے۔
