لاہور قلندرز کے آل راؤنڈر سکندر رضا نے سیکیورٹی ہدایات کی مبینہ خلاف ورزی کے معاملے پر وضاحت دیتے ہوئے کہا ہے کہ شاہین آفریدی نے کوئی من مانی نہیں کی بلکہ وہ ان کی درخواست پر ساتھ گئے تھے۔
مزید پڑھیں: لاہور قلندرز کے کپتان شاہین آفریدی اور سکندر رضا کی پی سی بی سیکیورٹی پروٹوکول کی خلاف ورزی
میڈیا سے گفتگو میں سکندر رضا کا کہنا تھا کہ انہوں نے خود شاہین آفریدی سے کہا تھا کہ ان کی فیملی آئی ہوئی ہے، جس پر وہ ان سے ملنے گئے۔
انہوں نے اعتراف کیا کہ اگر اس دوران سیکیورٹی پروٹوکول کی خلاف ورزی ہوئی تو اس کی مکمل ذمہ داری ان پر عائد ہوتی ہے۔
شاہین شاہ آفریدی نے کوئی من مانی نہیں کی وہ میری درخواست پر گیا تھا میں نے ہی اسے کہا تھا کہ میری فیملی آئی ہے۔ پہلے 4 سال میں ایسا کچھ نہیں تھا اگر کوئی تبدیلی ہوئی تو مجھے علم نہیں اس سارے معاملے کا مجرم آپ کے سامنے بیٹھا ہے، سکند رضا
— Mehwish Qamas Khan (@MehwishQamas) March 29, 2026
انہوں نے مزید کہا کہ گزشتہ 4 برس میں ایسا کوئی واقعہ پیش نہیں آیا، اور اگر سیکیورٹی انتظامات میں کوئی تبدیلی ہوئی ہے تو انہیں اس کا علم نہیں تھا۔
سکندر رضا نے واضح کیا کہ اس معاملے کا ذمہ دار وہ خود ہیں اور کسی اور کو موردِ الزام نہ ٹھہرایا جائے۔
واضح رہے کہ یہ معاملہ اس وقت سامنے آیا جب اطلاعات سامنے آئیں کہ شاہین آفریدی نے سیکیورٹی ہدایات کے باوجود پہلے حفاظتی حصار سے باہر جا کر دوستوں سے ملاقات کی اور بعد ازاں انہیں کچھ دیر کے لیے ہوٹل کے کمرے میں بھی رکھا، جس پر اب سکندر رضا نے اپنی وضاحت پیش کر دی ہے۔
مزید پڑھیں:شاہین آفریدی کا لاہور قلندرز کے اعزاز میں گرینڈ افطار ڈنر، ویڈیو وائرل
سکندر رضا زمبابوے سے تعلق رکھنے والے پاکستانی نژاد کرکٹر ہیں، جو اپنی جارحانہ بیٹنگ اور اسپن بولنگ (آل راؤنڈر) کی وجہ سے مشہور ہیں۔
24 اپریل 1986 کو سیالکوٹ میں پیدا ہونے والے سکندر رضا نے زمبابوے کی نمائندگی کرتے ہوئے بین الاقوامی کرکٹ میں کئی ریکارڈز قائم کیے ہیں اور وہ دنیا بھر کی لیگز میں بھی ایک اہم کھلاڑی سمجھے جاتے ہیں۔
