پاکستانی شوبز انڈسٹری کے معروف اداکار و ماڈل عمر شہزاد اور ان کی اہلیہ شانزے لودھی کی طواف کے دوران ہاتھ پکڑنے اور قربت کے مظاہرے کی ایک ویڈیو سوشل میڈیا پر وائرل ہو رہی ہے جس نے سوشل میڈیا پر ہنگامہ کھڑا کر دیا ہے۔
مداحوں نے جوڑے کے اس رویے کو مقدس مقام کے تقدس کے خلاف قرار دیتے ہوئے سخت تنقید کی ہے۔ایک صارف نے لکھا کہ ’یہ عمرہ ہے یا ہنی مون؟ ہمیں سمجھ نہیں آ رہی‘۔ ایک اور نے کہا، ’یہ مقدس جگہ ہے، پیرس کی سڑکیں نہیں جہاں رومانس کیا جائے۔‘
View this post on Instagram
ایک صارف نے مزید کہا کہ شوبز کے لوگوں کے لیے کوئی حد نہیں، انہوں نے مقدس جگہوں کو بھی نہیں چھوڑا۔ ایک اور نے تبصرہ کیا، ہم جانتے ہیں کہ تم ایک دوسرے سے محبت کرتے ہو، لیکن رومانس اپنے کمرے میں کرو۔ ایک اور نے کہا، جہالت کی حد ہے ایسی جگہ پر کون ایسا برتاؤ کرتا ہے؟
دیگر صارفین نے بھی جوڑے سے کہا کہ اس قسم کا رویہ مقدس مقامات کے احترام کے خلاف ہے اور انہیں ذاتی محبت کے اظہار کے لیے نجی جگہ کا انتخاب کرنا چاہیے۔ اور مقدس مقامات پر شائستگی اور احترام کے تقاضوں پر زور دے رہے ہیں۔
عمر شہزاد نے اپنے کیریئر کی شروعات 2016 میں فلم ’تیری میری لو اسٹوری‘ سے کی تھی، انہوں نے ’جوانی پھر نہیں آنی 2‘ جیسی بلاک بسٹر فلموں میں بھی اپنی اداکارانہ صلاحیتوں کا لوہا منوایا۔ اس کے علاوہ انہوں نے متعدد مقبول پاکستانی ڈراموں جیسے ’وہ پاگل سی‘، ’بھڑاس‘، ’میرے ہمسفر‘ اور ’اجنبی ہمسفر‘ میں بھی کام کیا۔
